اسلام آباد(پاکستان پوائنٹ نیوز27۔نومبر۔2018ء) حکومت نے نانبائیاں لئی گیس دیاں قیمتاں دے وادھے دا فیصلا واپس لے لیا اے، جیہدے مگروں ہن نان بائیاں ولوں روٹی 10رُپئے توں گھٹا کے 7تے نان 15رُپئے توں گھٹا کے 10رُپئے دا کرن دا اعلان کیتا گیا اے۔ تفصیل دے مطابق حکومت ولوں گیس دیاں قیمتاں وچ وادھے دا فیصلا کیتا گیا سی جیہدے تحت نان بائیاں لئی وی گیس دے ٹیرف وچ وادھے دا فیصلا کیتا گیا۔
گیس دیاں قیمتاں ودھان مگروں نان بائی ایسوسی ایشن نے روٹی تے نان دیاں قیمتاں ودھان دا اعلان کیتا سی ۔ جیہدی وجہ توں مزدور طبقہ لوک متاثر ہوئے سن۔ پر ہن نان بائیاں لئی گیس دے ٹیرف وچ وادھے دا فیصلا حکومت ولوں واپس لے لیا گیا اے۔ نان بائیاں دی ایسوسی ایشن نے ایس فیصلے اُتے خشی دا اظہار کردے ہوئے نان تے روٹی دیاں قیمتاں وچ کمی دا فیصلا کیتا اے۔ نان بائیاں ولوں روٹی 10رُپئے توں گھٹا کے 7تے نان 15رُپئے توں گھٹا کے 10رُپئے دا کرن دا اعلان کیتا گیا اے۔یاد رہوے کہ روٹی تے نان دیاں قیمتاں وچ وادھے اُتے بلاول بھٹو زرداری نے وی حکومت نوں تنقید دا نشانہ بنایا سی۔
