لندن(پاکستان پوائنٹ نیوز26۔نومبر۔2018ء) چیف جسٹس آف پاکستان جسٹس ثاقب نثار اجکل ڈیمز دی اُساری لئی فنڈ اکٹھا کرن لئی لندن وچ نیں ، جتھے اوہ ڈیم فنڈز لئی پیسے اکٹھے کر رہے نیں۔ یوکے پاکستان چیمبر آف کامرس اینڈ انڈسٹریز دے آہر ہیٹھ فنڈ ریزنگ تقریب نال خطاب کردے ہوئے چیف جسٹس ثاقب نثار نے موبائل کارڈ اُتے ٹیکس بحالی لئی لوکائی کولوں رائے منگ لئی اے۔
تقریب نال خطاب دوران چیف جسٹس آف پاکستان جسٹس ثاقب نثار دا آکھنا سی کہ لوکائی اُتے ڈیم بنان لئی ٹیکس لانا مناسب نہیں ہوئے گا۔ پر اسیں پری پیڈ موبائل کارڈ اُتے ود ہولڈنگ ٹیکس ختم کروایا سی تے جدوں حساب لایا تے پتا لگا کہ ایہدے نال ہر مہینے تن ارب رُپئے دی بچت ہوئی۔ چیف جسٹس ثاقب نثار دا آکھنا سی کہ جے قوم نے اجازت دتی تے پری پریڈ کارڈ اُتے فیر ٹیکس لاکے ڈیم دی اُساری لئی پیسے جمع کراں گے۔
اوہناں نے آکھیا کہ قوم میری ایس تجویز اُتے رائے بارے ضرور دسے۔ یاد رہوے کہ چالو ورھے سپریم کورٹ آف پاکستان نے پوسٹ پیڈ نمبرز اُتے سروس چارجز ختم کر دتے سن۔سنوائی دوران اے جی پنجاب دا آکھنا کہ سروس چارجز ختم کرن نال پنجاب نوں ہر مہینے 2ارب رُپئے دا نقصان ہویا اے۔ چیف جسٹس نے آکھیا کہ جے تُسیں غلط ٹیکس لے رہے سی تے ایہ نقصان نہیں اے۔ اک بندہ 100رُپئے دا کارڈ لوڈ کردا اے تے صوبے نوں پیسے کیوں دیوے۔ معاملے وچ کیہڑی سروس صوبہ دے رہیا اے جو چارجز ملن۔ تندور توں روٹی لے کے آن والے نوں روٹی کھان اُتے وی ٹیکس دینا پئے گا؟
