اسلام آباد(پاکستان پوائنٹ نیوز26۔نومبر۔2018ء) آئل اینڈ گیس ریگولیٹری اتھارٹی(اوگرا) نے دسمبر دے مہینے لئی پٹرولیم وستاں دیاں قیمتاں اُتے نظرثانی لئی سمری پٹرولیم ڈویژن نوں گھل دتی۔ سرکاری وسیلیاں نے پیرنوں دسیا کہ آؤندے مہینے پٹرولیم وستاں دیاں قیمتاں اُتے نظرثانی دے سلسلے وچ سمری وزارت توانائی پٹرولیم ڈویژن نوں دو دن پہلاں گھلی گئی اے۔
وسیلیاں نے دسیا کہ وزارت خزانہ 30نومبر نوں ایس سمری نوں حتمی شکل دیوے گی جیہدے مگروں نظرثانی شدہ قیمتاں دا نوٹی فکیشن جاری کیتا جائے گا۔ یاد رہوے کہ ایس توں پہلاں خبر آئی سی کہ عالمی منڈی وچ خام تیل ہور سستا ہون نال پاکستان وچ وی پٹرولیم وستاں دیاں قیمتاں گھٹ ہون دی آس پیدا ہوئی اے۔ پاکستان وچ پٹرول تے ڈیزل گھٹو گھٹ دس رُپئے فی لیٹر تیکر سستا ہو سکدا اے۔ عالمی منڈی وچ خام تیل دی قیمت 86ڈالر توں 62ڈالر 53سینٹ فی بیرل ہو گئی اے۔ عالمی منڈی وچ خام تیل دی ایہ قیمت 9مہینے دی گھٹ ترین سطح اُتے اے۔ 4اکتوبر توں ہن تیکر خام تیل دی قیمت وچ 24ڈالر فی بیرل کمی ہوئی۔ چار اکتوبر نوں خام تیل دی عالمی قیمت 86ڈالر فی بیرل سی۔
