لاہور(پاکستان پوائنٹ نیوز26۔نومبر۔2018ء) وزیر اعظم عمران خان تے آرمی چیف جنرل قمر جاوید باجوہ نے شمالی وزیرستان دا دورہ کیتا، وزیر اعظم عمران خان نوں خطے وچ امن لئی جاری آپریشنز تے متاثرین دی بحالی دے اقدامات تے اقتصادی امور بارے بریفنگ دتی گئی۔میڈیا رپورٹس دے مطابق وزیر اعظم پاکستان عمران خان نے آرمی چیف جنرل قمر جاوید باجوہ نال شمالی وزیرستان دادورہ کیتا۔
ایس موقعے اُتے وفاقی ، صوبائی وزیراں سنے گورنر تے وزیر اعلا کے پی کے وی نال سن۔ وزیر اعظم عمران خان نے یادگار شہداء اُتے پُھل چڑھائے۔ وزیر اعظم عمران خان نوں خطے وچ امن لئی جاری آپریشنز تے متاثرین دی بحالی دے اقدامات سنے اقتصادی صورتحال بارے بریفنگ دتی گئی۔ وزیر اعظم عمران خان نے دہشت گردی تے مشکل حالات وچ ساتھ دین اُتے فاٹا تے خیبرپختونخوا دے لوکاں دی تعریف کیتی۔
وزیر اعظم نے دہشت گردی خلاف کامیاب آپریشنز اُتے پاک فوج دی وی تعریف کیتی۔ وزیر اعظم نوں پاک افغان سرحد اُتے باڑ لان بارے وی بریفنگ دتی گئی۔ وزیراعظم عمران خان نے غلام خان بارڈر ٹرمینل دا دورہ وی کیتا تے بارڈ لان دے عمل دا جائزہ لیا۔ ایس موقعے تے وزیر اعظم عمران خان نے آکھیا کہ کسے ملک دی فوج نے اوہ کم نہیں کیتا جو ساڈی فوج نے کیتا اے۔
فاٹا دے لوکاں نے دہشت گردی دی جنگ دوران قربانیاں دتیاں نیں۔ قبائلی لوک دہشت گردی دی جنگ دوران اوکھے ویلے وچوں لنگھے نیں۔اوہناں نے آکھیا کہ ہن پاکستان پرائی جنگ ملک اندر نہیں لڑے گا۔ مسلط کیتی گئی جنگ وچ پاکستان دا بہت نقصان ہویا اے۔ اوہناں نے آکھیا کہ پاکستان نے دہشت گردی دی جنگ وچ سبھ توں ودھ قربانیاں دتیاں نیں۔ دہشت گردی دی جنگ وچ کسے ملک دی فوج نے اینا کم نہیں کیتا جِنا پاکستان نے کیتا اے۔جنگ وچ پاکستان دے اقتصادی تے معاشی شعبے متاثر ہوئے۔
