اسلام آباد(پاکستان پوائنٹ نیوز24۔نومبر۔2018ء) مسلم لیگ (ن) دے صدر و اپوزیشن لیڈر قومی اسمبلی شہباز شریف بارے پچھلے دیہاڑے انکشاف ہویا سی کہ اوہناں دی میڈیکل رپورٹ وچ کینسر دیاں علامتاں پائیاں گئیاں نیں۔ ایس حوالے نال اسلام آباد دے سرکاری ہسپتال پولی کلینک دے میڈیکل بورڈ نے منسٹر انکلیو وچ اپوزیشن لیڈر دے گھرای اوہناں دا ڈاکٹری معائنہ کیتا۔
پولی کلینک دے میڈیکل بورڈ نے اپنی مڈھلی رپورٹ وچ اپوزیشن لیڈر شہباز شریف نوں فٹ قرار دیندے ہوئے آکھیا کہ شہباز شریف فٹ نیں تے اوہناں نوں کینسر نہیں اے۔ پولی کلینک دے سینئر ڈاکٹر عرفان، ڈاکٹر نوید، ڈاکٹر حامد تے ڈاکٹر نیاز اُتے مشتمل میڈیکل بورڈ نے بیماری دی ہور تشخیص لئی فل بورڈ بنان دی سفارش وی کیتی، جیہدی رپورٹ جاری کیتی گئی اے۔ جاری رپورٹ دے مطابق مسلم لیگ (ن) دے صدر و اپوزیشن لیڈر قومی اسمبلی شہباز شریف نوں دوجیاں بیماریاں دیاں دوائیاں جاری رکھن دا آکھیا گیا اے۔میڈیکل بورڈ نے شہباز شریف دے سی ٹی سکین سنے ہور ٹیسٹ کروان دی سفارش وی کیتی اے۔ وسیلیاں نے ایس حوالے نال دسیا کہ شہباز شریف دا سی ٹی سکین کل اسلام آباد وچ کیتا جائے گا۔
