اسلام آباد(پاکستان پوائنٹ نیوز24۔نومبر۔2018ء) ریٹائرمنٹ دی عمر دی حد 60سال توں گھٹا کے 55سال تے پنشن ختم کرن بارے غور، حکومت ولوں تنخاہواں تے پنشن دا بھار گھٹ کرن تے سول سروس ریفارمز لیان دیاں تیاریاں۔تفصیل دے مطابق قومی پدھر(سطح) اُتے خرچیاں وچ کمی دی نویں حکمت عملی دے تحت تنخاہواں تے پنشن دا بھار گھٹ کرن لئی سول سروس ریفارمز دے تحت سرکاری ملازمت توں (ر) ہون دی حدزیادہ توں زیادہ عمر 60سال توں گھٹا کے 55سال کرن تے مستقبل وچ سارے پبلک سیکٹر کمپنیاں، کارپوریشناں تے مالیاتی اداریاں وچ نجی شعبے وانگ بغیر پنشن اُتے چنگی تنخاہ تے الاؤنس اُتے نوکریاں دین دی تجویز اے۔
وسیلیاں نے دسیا کہ ایس تجویز بارے آئی ایم ایف نوں دسیا گیا اے۔ تجویز دی منظوری نال وفاقی سیکرٹریاں دی وڈی گنتی (ر) ہو جائے گی۔ معاشی تے انتظامی صلاحات دے سلسلے وچ ایہ سبھ توں وڈی تجویز اے، جیہدے اُتے عملدرآمد نال نہ صرف آؤندے 5ورھیاں بلکہ آؤندے ویلے وچ وی تنخاہواں، سہولتاں تے پنشن دے بجٹ وچ کمی کیتی جا سکے گی۔ سول تے ملٹری پنشن دے سالہوار(سالانہ) خرچے پچھلے سال 333.35ارب رُپئے سن جو ہن ودھ کے 346ارب رُپئے تیکر اپڑ گئے نیں۔
ملٹری پنشن 253ارب رُپئے توں ودھ کے 259.77ارب رُپئے تے سول پنشن 80.35ارب رُپئے توں ودھ کے 82.221ارب رُپئے تیکر جا اپڑی اے۔سول حکومت دے خرچیاں دا کھلار جو پچھلے ورھے مالی سال دے آخیر اُتے 402.076ارب رُپئے سی ہُن 463ارب تیکر اپڑ جائے گا۔وسیلیاں دے مطابق تجویز چاراں صوبیاں وچ وی رائج کرن لئی کوششاں کیتیاں جان گیاں۔
