کراچی(پاکستان پوائنٹ نیوز24۔نومبر۔2018ء) بلاول بھٹو زرداری نے پارٹی چارج سنبھالدے ای پارٹی وچ کئی اصلاحات کیتیاں جدکہ عام انتخابات2018وچ پارٹی ٹکٹاں دی ونڈ دے موقعے اُتے بلاول بھٹو زرداری دے فیصلیاں تے اوہناں دیاں ہدایتاں نوں وی اہمیت دتی گئی۔ بلاول بھٹو زرداری تے آصف علی زرداری عام انتخابات وچ کامیاب ہو کے اک ایوان وچ تے اپڑ گئے پر ہن پارٹی پالیسی دے حوالے نال پیو پُتر وچ کئی اختلافات پیدا ہو گئے نیں جیہدے اُتے بلاول بھٹو زرداری نے فوری ایکشن دا فیصلا کیتا اے۔
تفصیل دے مطابق بلاول بھٹو زرداری نے اپنے پارٹی رہنماواں نوں اہم ٹاسک دتے نیں تے اپنے والد آصف علی زرداری دی مفاہمتی پالیسی نوں چھڈ دتا اے۔ پاکستان پیپلز پارٹی دے چیئرمین بلاول بھٹو زرداری نے آصف زرداری دی مفاہمتی پالیسی نوں چھڈ دے ہوئے حکمران جماعت تحریک انصاف نوں مونہ توڑ جواب دین، پارٹی تے اوہدی قیادت خلاف پراپیگنڈا کرن دا وی فیصلا کر لیا اے۔
پیپلز پارٹی دے رہنماواں نوں ہدایت کیتی گئی اے کہ پاکستان تحریک انصاف دی قیاد ت تے اہم رہنماواں نوں اوہناں دی بولی وچ جواب دتا جائے۔یاد رہوے کہ ایس توں پہلاں پاکستان پیپلز پارٹی آصف زرداری دی ہدایت اُتے چلدی سی پر بلاول بھٹو زرداری نے سیاسی سمجھ نال پارٹی دے تنظیمی تے ہور فیصلیاں وچ شامل ہونا شروع کیتا جیہدے مگروں پارٹی دا بُہتا کنٹرول اوہناں دے ہتھ وچ آگیا۔
