خادم حسین رضوی نوں 3ایم پی او دے تحت گرفتار کیتا گیا، نوٹی فکیشن جاری

خادم حسین رضوی نوں 3ایم پی او دے تحت گرفتار کیتا گیا، نوٹی فکیشن جاری

لاہور(پاکستان پوائنٹ نیوز24۔نومبر۔2018ء) پچھلی رات پاکستان تحریک انصاف دی حکومت نے تحریک لبیک ولوں 25نومبر نوں د تی جان والی احتجاجی کال نوں مُکھ رکھدے ہوئے پنجاب تے خاص کر راولپنڈی توں تحریک لبیک دے کارکناں نوں گرفتار کرنا شروع کیتا جیہدے مگروں تحریک لبیک دے قائدین نوں گرفتار کرلیا گیا۔ پچھلی رات تحریک لبیک دے کارکناں مگروں تحریک لبیک دے سربراہ خادم حسین رضوی تے ہور قیادت نوں وی گرفتار کر لیا گیا۔

جیہدے مگروں اسلام آباد دیاں اہم سڑکاں نوں کنٹینر لا کے بند کر دتا گیا اے۔ایس سلسلے وچ کراچی وچ موجود تحریک لبیک دے کارکناں دی گرفتاری وچ رینجرز نے وی مدد کیتی۔تحریک لبیک دے قائد خادم حسین رضوی نوں 3ایم پی او دے تحت گرفتار کیتا گیا جیہدا باقاعدہ نوٹی فکیشن وی جاری کر دتا گیا اے۔ وسیلیاں دے مطابق خادم حسین رضوی دی 3ایم پی او دے تحت گرفتاری دا نوٹی فکیشن جاری کر دتا گیا اے۔

جیہدے وچ دسیا گیا اے کہ خادم رضوی سنے 95بندیاں نوں گرفتار کرلیا گیا اے۔ سارے بندیاں نوں 3ایم پی او دے تحت گرفتار کیتا گیا تے سارے گرفتار بندے 30دن جیل وچ ای قید رہن گے۔یاد رہوے کہ پچھلی رات تحریک لبیک دے خلاف کریک ڈاؤن شروع ہون مگروں وفاقی وزیر اطلاعات فواد چودھری نے اپنے ٹویٹ وچ دسیا سی کہ تحریک لبیک دے قائد خادم حسین رضوی نوں حفاظتی تحویل وچ لیا گیا اے۔ جیہدی وجہ تحریک لبیک ولوں 25نومبر دی احتجاجی کال واپس نہ لینا اے۔