پشاور(پاکستان پوائنٹ نیوز24۔نومبر۔2018ء) خیبرپختونخوا دی رہائشی کُڑی نے جنس بدلن لئی عدالت نال رابطہ کر لیا۔ تفصیل دے مطابق خیبرپختونخوا دی رہائشی 22ورھیاں دی جوان کُڑی نے جنس بدلن دے معاملے اُتے پشاورہائی کورٹ نال رابطہ کیتااے۔ کائنات مراد ہری پور دی رہائشی اے۔ کائنات مراد نے عدالت وچ آکھیا کہ ایس معاشرے وچ کُڑی ہونا بہت مشکل اے۔ میں اپنے گھر وچ کمان والی واحد بندی آں تے میرے ماں پیو معذور نیں۔
کائنات مراد نے اپنے وکیل سیف اللہ محب کاکاخیل راہیں عدالت نال رابطہ کیتا تے اوہناں نوں آکھیا کہ اوہ ایس معاملے نوں قانونی شکل دین وچ اوہدی مدد کرن۔ کائنات نے آکھیا کہ جنس تبدیلی دے خاہشمند لوکاں نے غیر قانونی طریقہ تے ممنوعہ دوائیاں ورتیاں۔ کائنات نے آکھیا کہ ڈاکٹراں نے مینوں ہدایت کیتی اے، کہ جے میں اپنی جنس بدلوانا چاہنی آں تے مینوں سرجری کروانی پئے گی۔
کائنات نے ہور آکھیا کہ جنس بدلن دی اک وجہ ایہ وی اے کہ مینوں مرداں وچکار کم کرنا پیندا اے تے کیوں جے ایس معاشرے وچ کُڑی ہوکے کم کرنا بہت مشکل اے ایس لئی میں چاہنی آں کہ میں جنس بدل لواں تے ایہدے لئی مینوں عدالت ولوں اجازت چاہیدی۔کائنات مراد نے لیڈی ریڈنگ ہسپتال پشاور دے ڈائریکٹر، خیبر ٹیچنگ ہسپتال دے ڈائریکٹر تے حیات آباد میڈیکل کمپلیکس دے ڈائریکٹر نوں وی اپنی درخاست وچ فریق بنایا اے۔ ایس توں وکھ کائنات نے نادرا نوں وی اپنا ناں بدلن دی درخاست دتی ہوئی اے۔
