اسلام آباد(پاکستان پوائنٹ نیوز24۔نومبر۔2018ء) پی ٹی وی کرپشن کیس وچ ڈاکٹر شاہد مسعود نوں 5دناں دے جسمانی ریمانڈ اُتے ایف آئی اے دے حوالے کر دتاگیا۔ ایف آئی اے نے عدالت نوں دسیا کہ ملزم نے اپنے آپ نوں سرینڈر نہیں کیتا سی۔ تفتیش وچ بہت ساریاں چیزاں باقی نیں۔ تفصیل دے مطابق پی ٹی وی کرپشن کیس وچ ڈاکٹر شاہد مسعود نوں ایف آئی اے ٹیم نے اسلام آباد دی سیشن عدالت وچ پیش کیتا تے عدالت توں ڈاکٹر شاہد مسعود دے 10دناں دے جسمانی ریمانڈ دی استدعا کیتی۔
جیہدے اُتے ڈاکٹر شاہد مسعود دے وکیل نے آکھیا کہ 24گھنٹیاں دا ریمانڈ بہت اے۔ ایہدے توں زیادہ نہ دتا جائے۔ عدالت نے ایف آئی اے توں پُچھیا کہ کیہ تُسیں انکوائری کر لئی اے؟جیہدے اُتے ایف آئی اے نے آکھیا کہ ملزم نے اپنے آپ نوں سرینڈر نہیں کیتا سی۔ تفتیش دوران بہت ساریاں چیزاں باقی نیں۔ عدالت نے آکھیاکہ ایہ پہلا ریمانڈ اے یاں ایس توں پہلاں وی لیا گیا اے۔
جیہدے جواب وچ ایف آئی اے نے دسیا کہ پہلا ریمانڈ اے۔ کل ضمانت خارج ہون مگروں گرفتار کیتا گیا۔سنوائی دوران پی ٹی وی دے وکیل نے ہائی کورٹ دے ریکارڈ دیاں دستاویزات وی پیش کیتیاں تے آکھیا کہ ہائی کورٹ نے ملزم بارے کُجھ ہدایتاں دتیاں نیں اوہناں نوں وی ویکھ لئے۔ عدالت نے ایف آئی اے کولوں پُچھیا کہ کیہ کوئی انج دا ریکارڈ وی اے جو تُسیں اجے جمع کرانا اے۔ ایف آئی اے نے دسیا جی سانوں کُجھ ہور معلومات چاہیدیاں نیں۔ جیہدے مگروں عدالت نے ڈاکٹر شاہد مسعود نوں 5دناں دے جسمانی ریمانڈ اُتے ایف آئی اے دے حوالے کر دتا۔
