کراچی وچ چینی قونصلیٹ اُتے حملا، فیصل واڈا وی موقعے اُتے اپڑ ے، لوکائی ولوں تنقید

کراچی(پاکستان پوائنٹ نیوز23۔نومبر۔2018ء) کراچی وچ چینی قونصلیٹ اُتے حملا، فیصل واڈا وی موقعے اُتے اپڑ ے، لوکائی ولوں تنقید۔تفصیل دے مطابق اج سویرے کراچی دے علاقے کلنٹن بلاک4وچ دہشت گرداں نے چینی قونصلیٹ اُتے حملے دی کوشش کیتی جیہنوں پولیس تے رینجرز نے ناکام بناندے ہوئے حملا کرن والے تِناں دہشت گرداں نوں ہلاک کر دتا۔ تِنوں دہشتگرد لاپتا بندیاں دی لسٹ وچ شامل سن۔ دہشتگرد ازل خان، رازق تے رئیس نوں وی لاپتا سمجھیا جاندا سی۔ایس موقعے تے پاکستان تحریک انصاف دے رکن قومی اسمبلی و وزیر برائے آبی ذخائر فیصل واڈا وی پولیس تے رینجرز دی ہمت ودھان لئی موقعے اُتے اپڑے۔ ایس دوران اوہناں دے محافظ وی نال سن تے اوہناں نے بلٹ پروف جیکٹ پائی ہوئی سی۔ ایس موقعے تے اوہناں کولوں پُچھیا گیا کہ کیہ اوہ دہشت گرداں نال مقابلے لئی تیار نیں تے اوہناں نے آکھیا کہ اوہ بالکل تیار نیں۔ ویڈیو بنان والے بندے نے اوہناں دے پستول دی ویڈیو وی بنائی، پر اک پاسے جتھے اوہناں دے ایس کم نوں سلاہیا جا رہیا اے اوتھے دوجے پاسے اوہناں نوں تنقید دا نشانہ بناندے ہوئے لوکاں دا آکھنا اے کہ دہشتگرداں نال مقابلا کرنا اوہناں دے اختیار وچ نہیں ایس لئی اوہناں نوں ایس موقعے اُتے سیاست چمکان دی بجائے اپنے اداریاں نوں تھاپڑی دینی چاہیدی۔