بلوچ لاپتا بندیاں دی لسٹ دا بھانڈا بھج گیا

چینی قونصلیٹ اُتے حملا کرن والے دہشت گرداں دا ناں لاپتا بندیاں دی لسٹ وچ موجود

بلوچ لاپتا بندیاں دی لسٹ دا بھانڈا بھج گیا
چینی قونصلیٹ اُتے حملا کرن والے دہشت گرداں دا ناں لاپتا بندیاں دی لسٹ وچ موجود

کراچی(پاکستان پوائنٹ نیوز23۔نومبر۔2018ء) کراچی وچ چینی قونصلیٹ دے نیڑے حملا کرن والے تِناں دہشت گرداں دی شناخت کر لی گئی اے۔ تفصیل دے مطابق اج سویرے کراچی دے علاقے کلنٹن بلاک4وچ دہشت گرداں نے چینی قونصلیٹ اُتے حملے دی کوشش کیتی جیہنوں پولیس تے رینجرز نے ناکام بناندے ہوئے حملا کرن والے تِناں دہشت گرداں نوں ہلاک کر دتا۔ تِنوں دہشتگرد لاپتا بندیاں دی لسٹ وچ شامل سن۔

دہشتگرد ازل خان، رازق تے رئیس نوں وی لاپتا سمجھیا جاندا سی۔دوجے پاسے بلوچ علیحدگی پسند تنظیم ’بلوچ لبریشن آرمی‘ نے ایس حملے دی ذمے واری قبول کیتی اے۔ برطانوی نشریاتی ادارے بی بی سی دے مطابق بلوچ علیحدگی پسند تنظیم دے ترجمان نے فون اُتے حملے دی ذمے واری قبول کردے ہوئے بی بی سی نوں دسیا کہ اوہناں دے تن ارکان ایس کارروائی وچ شامل نیں تے ایہ چین لئی اک تنبیہ اے۔

علیحدگی پسند تنظیم ’بلوچ لبریشن آرمی‘ دے اک ترجمان نے چینی قونصلیٹ اُتے حملے دی ذمے واری قبول کردے ہوئے بی بی سی نوں دسیا کہ اوہناں دے مجید بریگیڈ دے تن لوک ایس کارروائی وچ شامل سن۔ اوہناں نے آکھیا کہ ایہ چین لئی اک اشارہ اے کہ اوہ ساڈی زمین اُتے قبضے دی کوشش چھڈ دیوے نہیں تے آن والے ویلے نوں اوہنوں ہور خطرناک معاملات دا ساہمنا کرنا پئے گا۔

بلوچ لبریشن آرمی ولوں حملے دی ذمے واری قبول کرن دے تانے بانے بھارت نال وی ملدے نیں۔بھارت پاک چین تعلقات نوں خراب کرن دے نال نال پاک چین اقتصادی راہداری منصوبے نوں نقصان اپڑانا چاہندا اے۔یاد رہوے کہ بھارتی جاسوس کلبھوشن یادیو نے اپنے اعترافی بیان وچ ’بلوچ لبریشن آرمی‘ نوں بھارتی فنڈنگ دا انکشاف کردے ہوئے منیا سی کہ ایہ تنظیم بھارت دی ایما اُتے ای پاکستان وچ کارروائیاں کردی اے۔