کراچی(پاکستان پوائنٹ نیوز23۔نومبر۔2018ء) کراچی وچ اج سویرے چینی قونصلیٹ اُتے دہشت گرداں نے حملے دی کوشش کیتی جیہنوں پولیس تے رینجرز نے ویلے سِر کارروائی کردے ہوئے ناکام بنا دتا۔ ایس حملے دی ذمے واری وی قبول کر لی گئی اے۔ تفصیل دے مطابق بلوچ علیحدگی پسند تنظیم ’بلوچ لبریشن آرمی‘ نے ایس حملے دی ذمے واری قبول کیتی اے۔ برطانوی نشریاتی ادارے بی بی سی دے مطابق بلوچ علیحدگی پسند تنظیم دے ترجمان نے فون اُتے حملے دی ذمے واری قبول کردے ہوئے بی بی سی نوں دسیا کہ اوہناں دے تن ارکان ایس کارروائی وچ شامل نیں تے ایہ چین لئی اک تنبیہ اے۔
علیحدگی پسند تنظیم ’بلوچ لبریشن آرمی‘ دے اک ترجمان نے چینی قونصلیٹ اُتے حملے دی ذمے واری قبول کردے ہوئے بی بی سی نوں دسیا کہ اوہناں دے مجید بریگیڈ دے تن لوک ایس کارروائی وچ شامل سن۔ اوہناں نے آکھیا کہ ایہ چین لئی اک اشارہ اے کہ اوہ ساڈی زمین اُتے قبضے دی کوشش چھڈ دیوے نہیں تے آن والے ویلے نوں اوہنوں ہور خطرناک معاملات دا ساہمنا کرنا پئے گا۔
بلوچ لبریشن آرمی ولوں حملے دی ذمے واری قبول کرن دے تانے بانے بھارت نال وی ملدے نیں۔بھارت پاک چین تعلقات نوں خراب کرن دے نال نال پاک چین اقتصادی راہداری منصوبے نوں نقصان اپڑانا چاہندا اے۔یاد رہوے کہ بھارتی جاسوس کلبھوشن یادیو نے اپنے اعترافی بیان وچ ’بلوچ لبریشن آرمی‘ نوں بھارتی فنڈنگ دا انکشاف کردے ہوئے منیا سی کہ ایہ تنظیم بھارت دی ایما اُتے ای پاکستان وچ کارروائیاں کردی اے۔
