اسلام آباد(پاکستان پوائنٹ نیوز22۔نومبر۔2018ء) چیف جسٹس آف پاکستان جسٹس ثاقب نثار دا آکھنا اے کہ جے آسیہ بی بی نے باہرلے ملک سیاسی پناہ لئی تے اوہ گھر والیاں سنے باہرلے ملک منتقل ہوگئی تے ایہ پاکستانی حکومت دی سبھ توں وڈی ناکامی ہوئے گی۔ لندن وچ پاکستانی نژاد برطانوی ارکان پارلیمنٹ نال گل بات کردے ہوئے جسٹس ثاقب نثار نے آکھیا کہ آسیہ بی بی دے کیس وچ اینی دیر نہیں ہونی چاہیدی سی۔
ملاقات دوران پاکستانی نژاد برطانوی ارکان پارلیمنٹ سیدہ وارثی تے رحمان چشتی نے آسیہ بی بی کیس بارے سوال چُکیا ۔ چیف جسٹس دا آکھنا سی کہ پاکستان دے عدالتی نظام وچ کُجھ اصلاحات کرن دی ضرورت اے تاں جے لوکائی نوں چھیتی توں چھیتی انصاف دی فراہمی نوں یقینی بنایا جا سکے۔ سیدہ وارثی نے آسیہ بی بی نوں برطانیہ وچ سیاسی پناہ دین بارے گل کیتی ، جیہدے اُتے چیف جسٹس نے آکھیا کہ میرا مننا اے کہ آسیہ بی بی نوں سیاسی پناہ نہیں دوانی چاہیدی۔
اوہناں دا آکھنا سی کہ آسیہ بی بی نوں باہرلے ملک سیاسی پناہ مل گئی تے ایہ حکومت پاکستان دی سبھ توں وڈی ناکامی ہوئے گی کیونکہ لوکائی دی جان و مال دا تحفظ کرن دی پوری ذمے واری حکومت دی ہوندی اے۔ اوہناں نے آکھیا کہ ایس حوالے نال حکومت پاکستان نوں سخت اقدامات کرنے پین گے۔ نہیں تے ہور انج دے کیس وی ختم نہیں ہون گے۔ آسیہ بی بی نوں پاکستان وچ ای تحفظ ملنا چاہیدا۔ آسیہ بی بی دی زندگی نوں محفوظ بنانا حکومت وقت دی ذمے واری اے۔آسیہ بی بی دا ناں ای سی ایل وچ پائے جان بارے سوال دے جواب وچ چیف جسٹس نے آکھیا کہ قانون وچ ایہدی کوئی اجازت نہیں اے۔ اوہناں نے آکھیاکہ عدلیہ انج دا کوئی حکم جاری نہیں کرے گی۔ جو عدلیہ دے اپنے قوانین دے اُلٹ ہوئے۔
