پتراجایہ(پاکستان پوائنٹ نیوز22۔نومبر۔2018ء) وزیر اعظم عمران خان 2 دناں دے دورے اُتے ملائیشیا گئے سن۔ وزیر اعظم عمران خان اپنے دورے دوران بدھ د ی سویر ملائیشیا دے وزیر اعظم ڈاکٹر مہاتیر محمد دے دفتر اپڑے۔ ایس موقعے تے وزیر اعظم عمران خان دا چاہواں نال استقبال کیتا گیا تے گارڈ آف آنر پیش کیتا گیا۔ ایس موقعے تے دوناں ملکاں دے قومی ترانیاں دیاں دھناں وجائیاں گئیاں۔ وزیراعظم عمران خان دے ملائیشیا وچ ہون والے استقبال نے ہر پاسے دھم مچا دتی اے۔ پراوہناں دے دورے دوران دلچسپ ماحول اودوں پیدا ہویا جدوں ملائیشیا دے وزیر اعظم ڈاکٹر مہاتیر محمد تے اوہناں دی گھروالی دا عمران خان نال فوٹو شوٹ ہو رہیا سی تے ملائیشیا دے وزیر اعظم ڈاکٹر مہاتیر محمد دی بیوی نے عمران خان توں درخاست کیتی کہ اوہ اوہناں دا ہتھ پھڑ کے تصویر بنوانا چاہندیاں نیں۔ وزیراعظم عمران خان نے وی خشی نال اجازت دے دتی۔ پر ایس موقعے اُتے پورے ہال وچ ہاسا چُھٹ پیا۔ جیہدے توں ایہ گل واضح ہوندی اے کہ عمران خان جیہناں دے چاہن والے پوری دنیا وچ موجود نیں تے انج ملائیشین وزیر اعظم دی گھر والی وی عمران خان دی فین نکلی اے۔
