ممبئی(پاکستان پوائنٹ نیوز22۔نومبر۔2018ء) کسے وی ملک دی فوج اوس ملک دی محافظ ہوندی اے جو اپنی جان اُتے کھیڈ کے ملک تے قوم نوں تحفظ دیندی اے تے ملک ول میلی اکھ نال ویکھن والیاں نوں سبق سکھاندی اے۔ پر بھارتی فوج دے چیف تے آپے ای ملک اندر دھماکے کروان وچ مبینہ طور اُتے ملوث نکلے۔ تفصیل مطابق بھارت دے مقامی اخبار ٹائمز آف انڈیا دی رپورٹ وچ دسیا گیا اے کہ بھارتی آرمی چیف جنرل بپن روات مبینہ طور اُتے ملک اندر ہون والے بم دھماکے وچ ملوث پائے گئے نیں۔
بھارتی آرمی چیف جنرل بپن روات اُتے ایہ الزام عام آدمی پارٹی دے لیڈر ایچ ایس پھولکا نے لایا۔ کُجھ دن پہلاں امرتسر وچ نیرن کار بھون اُتے اک بم دھماکا ہویا،جیہدے بارے ایچ ایس پھولکا دا آکھنا سی کہ ایہ دھماکا آپ آرمی چیف جنرل بپن روات نے کروایا اے۔ایس دھماکے وچ تن بندے ہلاک تے کئی زخمی ہوئے سن۔ رپورٹ دے مطابق ایہ الزام لان مگروں جدوں انتہا پسند ہندوواں نے ایچ ایس پھولکا نوں دھماکانا تے احتجاج کرنا شروع کیتا تے ایچ ایس پھولکا نے دباء تے خوف وچ آکے اپنا بیان واپس لے لیا تے ایہدے اُتے معافی منگی۔
اپنے اگلے بیان وچ ایچ ایس پھولکا دا آکھنا سی کہ میرے بیان دا مقصد ایہ سی کہ تاریخ ایس گل دی گواہ اے کہ بیتے ویلے وچ وی حکومتاں اپنے مفاداں لئی پرتشدد واقعات رونما کرواندیاں رہیاں نیں۔ میرا بیان آرمی چیف دے خلاف نہیں سی میں ایہدے اُتے معذرت چاہنا واں۔
