لاہور(پاکستان پوائنٹ نیوز20۔نومبر۔2018ء) شریف خاندان دے (ن) لیگی قیادت توں دستبرداری دیاں خبراں۔ تفصیل مطابق مشہور پرچا کار سعید قاضی دا کُجھ دن پہلاں نیب آفس وچ شریف خاندان دی آپس وچ ہون والی ملاقات بارے گل بات کردے ہوئے آکھنا سی کہ نیب آفس وچ ہون والی ایس ملاقات وچ پارٹی دی قیادت سنبھالن لئی ناواں بارے غور کیتا گیا۔ جیہدے لئی سابق وزیر داخلا احسن اقبال، سابق وزیر خارجا خواجا آصف تے سابق وزیر اعظم شاہد خاقان عباسی دا ناں لیا گیا۔
جدکہ صوبائی و قومی اسمبلی دے ارکان وچ وی ایہ خبراں گھم رہیاں نیں کہ اوہ مسلم لیگ (ن) دی اک وکھ جماعت بنالین۔ اوہ آکھ رہے نیں کہ ایس گھرانے توں جان چھڈان تے اپنی پارٹی وی بچان۔ جیہدے اُتے پروگرام وچ موجود تجزیہ کار چودھری غلام حسین دا آکھنا سی کہ پارٹی بچنی اے تے نہ ای گھرانہ وکھ ہونا اے جیہڑے لوکاں دا پارٹی قیادت لئی ناں دتا جا رہیا اے کیہ اوہناں نے گھٹ لُٹ مار کیتی اے؟یاد رہوے کہ تن دن پہلاں آشیانہ ہاؤسنگ سکینڈل وچ گرفتار اپوزیشن لیڈر شہباز شریف نال سابق وزیر اعظم نواز شریف تے اوہناں دی دھی مریم نواز نے ملاقات کیتی سی۔
