اسلام آباد(پاکستان پوائنٹ نیوز20۔نومبر۔2018ء) کراچی وچ موجود بلوچستان ہاؤس اندر موجود ناکارہ گڈیاں وچوں شراب برآمد ہوئی اے۔ کئی ورھیاں توں بند سرکاری دفتر وچ شراب پین دے انکشاف مگروں حکام سِر پھڑ کے بِہ گئے۔ تفصیل مطابق کراچی وچ موجود بلوچستان ہاؤس اندر شراب پین دا انکشاف اوس ویلے ہویا جدوں اوتھے موجود ناکارہ گڈیاں وچوں شراب برآمد ہوئی۔
بلوچستان ہاؤس لَمے چِر توں بند پیا سی تے اوتھے موجود ناکارہ گڈیاں وی کسے دے استعمال وچ نہیں سن۔حکومت ولوں بلوچستان ہاؤس نوں فیر کھولن دا فیصلا کیتا گیا سی جیہدے مگروں دفتری عملا ہاؤس کھولن لئی اوتھے گھلیا گیا تے دفتر دی ناکارہ گڈیاں وچوں شراب دیاں بوتلاں برآمد ہوئیاں۔ کئی ورھیاں توں بند پئے سرکاری دفتر وچ شراب دیاں بوتلاں ویکھ کے سرکاری ملازم حیران رہ گئے۔پر عملے نے شراب دیاں بوتلاں قبضے وچ لے کے متعلقہ حکام نوں گھل دتیاں نیں۔
