لاہور(پاکستان پوائنٹ نیوز20۔نومبر۔2018ء) ویاہ دا ناں سُندے ای ذہن وچ ویاہ دے مہنگے کپڑے تے بلدیاں بتیاں دا خیال آؤندا اے۔ ایہدے وچ کوئی شک نہیں اے کہ اسلامی ملک ہون مگروں وی اسیں ویاہ دی تقریب وچ کئی انج دیاں رسماں اپنے اُتے فرض کر لئیاں نیں جیہدا حقیقی زندگی نال کوئی تعلق نہیں اے۔ ایہو نہیں بلکہ اک ویاہ دیاں کئی کئی تقریباں ہوندیاں نیں، جیہدے وچ مایوں، مہندی، ڈھولکی، قوالی نائٹ، جنج، ولیمہ تے ایسے طرحاں دیاں کئی رسماں ہوندیاں نیں پر اج کل دے دور وچ انج دے کئی نوجوان کُڑیاں تے مُنڈے نیں جیہناں وچ ایس حوالے نال شعود پیدا ہو گیا اے تے اوہ دُھوم دھام نال ویاہ کرن نوں صرف پیسہ ضائع کرنا قرار دیندے نیں۔
اِنجدے ای اک جوڑے دی کہانی سوشل میڈیا اُتے وائرل ہوئی اے جیہناں نے نہ تے مہنگے کپڑے پائے، نہ کوئی ڈھول ڈھمکا کیتا۔ سوشل میڈیا اُتے وائرل ہون والی پوسٹ وچ ایس جوڑے دی تصویر وی موجود اے۔ فیس بک پوسٹ دے مطابق ایس جوڑے نے 9مئی2018نوں سادگی نال نکاح کیتا۔ ایس پوسٹ وچ موجود تصویر اوہناں دے نکاح توں کوئی اک گھنٹہ بعد دی اے۔ تصویر وچ اوہناں دی سادگی نوں ویکھ کے کوئی وی اہناں نوں داد دتے بغیر نہ رہ سکیا۔
پوسٹ دے مطابق نکاح دی تقریب بہت سادگی نال ہوئی جیہدے وچ لاڑی تے لاڑے دے ماں پیو تے لاگے دے رشتے دار رلتی ہوئے۔ ویاہ مگروں جوڑا نتھیا گلی چلا گیا ۔ نتھیا گلی توں ایتوار نوں جوڑا واپس آکے پیر دی سویر اپنی اپنی نوکری اُتے چلا گیا۔ جدکہ ولیمے دی روٹی ایدھی سنٹر نوں گھلی گئی۔ سوشل میڈیا اُتے سادگی نال کیتے گئے ویاہ نوں سلاہیا جا رہیا اے۔سوشل میڈیا اُتے لوکاں دا آکھنا اے کہ سانوں ساریاں پرانیاں ریتاں نوں ختم کر کے ویاہ نوں آسان بنانا چاہیدا۔
