ڈونلڈ ٹرمپ دا پاکستان خلاف بیان:خواجا آصف ولوں ٹرمپ نوں مونہ توڑ جواب

ڈونلڈ ٹرمپ دا پاکستان خلاف بیان:خواجا آصف ولوں ٹرمپ نوں مونہ توڑ جواب

لاہور(پاکستان پوائنٹ نیوز19۔نومبر۔2018ء) امریکی صدر ڈونلڈ ٹرمپ دے بیان اُتے سابق وزیر خواجا آصف نے ٹویٹ کردے ہوئے امریکی صدر نوں تنقید دا نشانہ بنایا اے۔ تفصیل مطابق سابق وفاقی وزیر خواجا آصف دا آکھنا اے کہ اسیں امریکا لئی جو کیتا اے اوہدی قیمت اسیں ہن تیکر اپنے خون نال چُکا رہے آں۔ امریکا لئی اسیں بدھ بیر سنے اوہ جنگاں وی لڑیاں نیں جو ساڈیاں نہیں سن۔

اوہناں دا آکھنا سی کہ امریکی مفاداں لئی اسیں نویں مسلک ایجاد کیتے ایتھوں تیکر کہ امریکا لئی اپنی رواداری اُتے مبنی قدراں نوں تباہ کر کے اسیں عدرواداری لے آئے۔ خواجا آصف نے پاکستان تے امریکا دے تعلق نوں بے وفائیاں تے پابندیاں اُتے مبنی قرار دتا۔دوجے پاسے وزیر اعظم عمران خان نے امریکی صدر ڈونلڈ ٹرمپ دے پاکستان مخالف بیان اُتے اپنے ردعمل وچ آکھیا کہ صدر ٹرمپ نوں پاکستان بارے اپنا ریکارڈ ٹھیک کرن دی ضرورت اے۔

اوہناں نے آکھیا کہ نائن الیون حملیاں وچ کوئی پاکستانی ملوث نہیں سی۔ پاکستان نے دہشت گردی دی جنگ وچ امریکا دا ساتھ دتا۔ وزیر اعظم عمران خان دا آکھنا سی کہ دہشت گردی خلاف جنگ وچ پاکستان نوں 123ارب ڈالر توں ودھ دا نقصان ہویا اے۔ جدکہ امریکا نے پاکستان نوں صرف 20ارب دی امداد دتی اے۔اوہناں نے آکھیا کہ پاکستان نے دہشت گردی خلاف جنگ وچ 75ہزار قربانیاں دتیاں۔ یاد رہوے کہ امریکی صدر ڈونلڈ ٹرمپ نے پاکستان دیاں قربانیاں دا اعتراف کرن دی بجائے تنقید کیتی اے۔ اوہناں نے آکھیا کہ پاکستان نے ساڈے لئی کُجھ نہیں کیتا۔ اسیں پاکستان نوں سالہوار اک ارب 30کروڑ ڈالر توں ودھ دتے سن۔ پر اسامہ بن لادن اوتھے رہندا سی۔ اسیں ایسے لئی پاکستان دی امداد روکی۔