لاہور(پاکستان پوائنٹ نیوز19۔نومبر۔2018ء) ماڈل ٹاؤن دُکھانت کیس دی سنوائی اج سپریم کورٹ لاہور رجسٹری وچ ہوئی۔ چیف جسٹس میاں ثاقب نثار دی سربراہی وچ دو رکنی بنچ نے ماڈل ٹاؤن دُکھانت دیاں تحقیقات لئی نویں جے آئی ٹی بنان بارے درخاست اُتے سنوائی کیتی۔سنوائی دوران ماڈل ٹاؤن وچ توڑ بھن کرن والے (ن) لیگی کارکن گلو بٹ نے عدالت وچ آکھیا کہ میرا کوئی قصور نہیں اے۔
چیف جسٹس آف پاکستان جو وی حکم دین گے قبول ہوئے گا۔ سنوائی دوران گلو بٹ دا آکھنا سی کہ ماڈل ٹاؤن دُکھانت وچ اوہناں دا کوئی قصور نہیں سی۔ گلو بٹ نے اپنے آپ نوں قصور وار قرار دیند ے ہوئے عدالت دا ہر حکم منن دا آکھیا ۔ایس توں وکھ سنوائی دوران ڈی جی نیب لاہور سلیم شہزاد نے دسیا کہ مسلم لیگ (ن) دے صدر شہباز شریف اج پیش نہیں ہونا چاہندے۔ شہباز شریف نے اوہناں دی تھاں وکیل نوں پیش کرن دا آکھیا اے۔
سلیم شہزاد نے دسیاکہ شہباز شریف نے تحریری طور اُتے دسیا اے کہ اوہ کیس دی سنوائی وچ پیش نہیں ہونا چاہندے۔ سپریم کورٹ لاہور رجسٹری وچ اج ہون والی سنوائی دوران چیف جسٹس آف پاکستان نے ماڈل ٹاؤن دُکھانت دیاں تحقیقات لئی نویں جے آئی ٹی بنان لئی 5رکنی لارجر بنچ بنان دا حکم وی دتا۔ بنچ 5دسمبر توں اسلام آباد وچ کیس دی سنوائی کرے گا۔ ایس توں وکھ سنوائی دوران سابق وزیر اعظم نواز شریف، سابق وزیر اعلا پنجاب شہباز شریف، حمزہ شہباز تے سابق صوبائی وزیر قانون رانا ثنااللہ دے وکیل نے عدالت توں مہلت منگدے ہوئے آکھیا کہ قانونی نکتیاں اُتے تیاری لئی مہلت دتی جائے۔ جیہدے اُتے عدالت نے اوہناں نوں دو ہفتیاں دی مہلت دے دتی۔
