راولپنڈی(پاکستان پوائنٹ نیوز19۔نومبر۔2018ء) پاک فوج دے ترجمان میجر جنرل آصف غفور نے آکھیا اے کہ بھارتی مس ایڈونچر دی کوشش دا بھرپور جواب دتا جائے گا، پاکستان امن پسند تے خطے وچ امن دا خاہشمند ملک اے، بھارتی فورسز جان بُجھ کے شہری آبادیاں نوں نشانہ بناندی اے، پاک فوج ولوں جواب دے طور اُتے بھارتی پوسٹاں نوں نشانہ بنایا جاندا اے۔ آئی ایس پی آر مطابق آزاد کشمیر، گلگت بلتستان تے ہزارہ ڈویژن دے پرچا کاراں نے آئی ایس پی آر دے دورے دے موقعے اُتے میجر جنرل ڈی جی آئی ایس پی آر نال ملاقات کیتی۔
پرچا کاراں نے ملاقات دوران اپنے اپنے علاقے دی سکیورٹی صورتحال بارے فیڈ بیک دتا تے پاک فوج دے جاری ترقیاتی کماں بارے دسیا۔ ترجمان پاک فوج نے پرچا کاراں نوں دسیا کہ بھارت ولوں ایل او سی اُتے ہتھیاراں نال انھے واہ فائرنگ کیتی جاندی اے۔ بھارتی فورسز جانکے شہری آبادی نوں نشانہ بندیاں نیں جدکہ پاک فوج ولوں جواب دے طور اُتے صرف بھارتی پوسٹاں نوں نشانہ بنایا جاند ااے۔ لائن آف کنٹرول دے دوناں پاسے کشمیری بھائی رہندے نیں۔ ایس لئی پاک فوج صرف بھارتی پوسٹاں نوں نشانہ بناندی اے۔ ترجمان پاک فوج نے دسیا کہ بھارتی مس ایڈونچر دی کوشش دا بھرپور جواب دتا جائے گا۔اوہناں نے آکھیا کہ پاکستان امن پسند تے امن دا خاہشمند ملک اے۔
