لاہور(پاکستان پوائنٹ نیوز17۔نومبر۔2018ء) ماڈل ٹاؤن دُکھانت وچ نویں جے آئی ٹی بنان دی درخاست سنوائی لئی مقرر کر لی گئی اے۔ چیف جسٹس میاں ثاقب نثار دی سربراہی وچ 2رکنی بنچ 19نومبر نوں درخاست اُتے سنوائی کرے گا۔ عدالت نے نواز شریف تے شہباز شریف نوں 19نومبر لئی نوٹس جاری کر دتا ۔ نوٹس دی کاپی حمزہ شہباز، سعد رفیق، خواجا آصف، دانیال عزیز سنے (ن) لیگ دے ہور اہم رہنماواں نوں گھلی گئی اے۔
یاد رہوے کہ ایس توں پہلاں ماڈل ٹاؤن دُکھانت بارے سپریم کورٹ نے ہائی کورٹ دے فیصلے خلاف اپیل سنوائی لئی مقرر کر دتی سی۔ ماڈل ٹاؤن دُکھانت کیس وچ پاکستان عوامی تحریک نے لاہور ہائی کورٹ دے فیصلے خلاف سپریم کورٹ وچ نظرثانی دی اپیل دائر کیتی سی جیہنوں سپریم کورٹ ولوں سنوائی لئی مقرر کر لیا گیا اے۔ سپریم کورٹ نے درخاست گزار سنے سارے فریقاں نوں نوٹس جاری کر دتے نیں۔
درخاست وچ نواز شریف، شہباز شریف تے رانا ثنااللہ نوں طلب کرن دی استدعا کیتی گئی سی۔ درخاست وچ آکھیا گیا سی کہ عدالت نے ماڈل ٹاؤن دُکھانت کیس وچ مرکزی ملزماں نوں طلب نہیں کیتا سی ، ایس وجہ توں اوہناں دے بیان ریکارڈ نہیں کیتے گئے ۔ ایس نتیجے وچ انصاف دے تقاضے پورے نہیں ہوندے۔جیہدے مگروں ہن چیف جسٹس دی سربراہی وچ 2رکنی بنچ جمعے نوں کیس دی سنوائی کرے گا۔
