پشاور(پاکستان پوائنٹ نیوز17۔نومبر۔2018ء) جمعیت علمائے اسلام(س) دے سربراہ مولانا سمیع الحق دی قبر کشائی دا فیصلاکرلیا گیا اے۔ تفصیل مطابق راولپنڈی سپیشل انوسٹی گیشن ٹیم نے قانونی تقاضے پورے کرن تے مولانا سمیع الحق دا پوسٹ مارٹم کروان لئی عدالت نال رابطہ کر لیا اے۔ تفتیشی ٹیم نے سیشن جج راولپنڈی نوں قبر کشائی تے پوسٹ مارٹم کران دی درخاست دتی اے۔
جدکہ عدالت نے درخاست سیشن جج نوشہرہ نوں گھل دتی اے۔ سیشن جج نوشہرہ ولوں حکم ملن دے بعد متعلقہ مجسٹریٹ نے مولانا سمیع الحق دے وارثاں، مقامی پولیس تے حکام نوں نوٹس جاری کر دتے نیں۔ تفتیشی ٹیم دے سب انسپکٹر جمیل دی قیادت وچ پولیس ٹیم اکوڑہ خٹک وچ موجود اے تے اوہنوں قبر کشائی تے پوسٹ مارٹم لئی عدالتی کارروائی پوری ہون تیکر اوتھے رہن دی ہدایت کیتی گئی اے۔
ایس توں وکھ راولپنڈی پولیس دے ایس ایچ او ائر پورٹ انسپکٹر عامر مولانا سمیع الحق دے سیکرٹری احمد شاہ نوں لبھ کے راولپنڈی لیان لئی وی اکوڑہ خٹک وچ موجود نیں جدکہ مولانا دے دو موبائل فونز تے سیکرٹری سید احمد شاہ دے موبائل نمبرز دی فرانزک رپورٹ پولیس نوں مل گئی اے۔ پولیس دے مطابق مولانا سمیع الحق عام فون تے سیکرٹری احمد شاہ سمارٹ فون استعمال کردے سن۔ احمد شاہ نے بُہتے فون سمارٹ فونز ایپلیکشنز وٹس ایپ ، وائبر تے ایمو وغیرہ توں کیتے، اوہدی وجہ توں وی پولیس نوں اوکڑاں دا ساہمنا اے۔
