لاہور(پاکستان پوائنٹ نیوز17۔نومبر۔2018ء) ’نیا پاکستان ہاؤسنگ سکیم‘دے تحت 3مرلے دے گھر دی متوقع قیمت 12توں 13لکھ رُپئے ہوئے گی۔ تفصیل مطابق اقتدار وچ آن توں پہلاں پاکستان تحریک انصاف نے غریب لوکاں لئی گھر بنان دے وعدے نوں اپنے منشور وچ شامل کیتا ۔جیہدے بعد عمران خان نے وزارت اعظمی دا عہدہ سنبھالن دے دو مہینیاں مگروں ای ’نیا پاکستان ہاؤسنگ سکیم‘ منصوبے دی نیہہ رکھی۔
پر ہن ایس منصوبے وچ شامل گھراں دی ممکنہ قیمت ساہمنے آگئی اے۔ ایس بارے نجی ٹی وی نال گل بات کردے ہوئے صوبائی وزیر برائے ہاؤسنگ میاں محمود الرشید نے آکھیا کہ مستحق بندیاں نوں تن مرلے دا گھر 12توں 13لکھ وچ دین دا ارادہ اے۔ اوہناں نے آکھیا کہ درخاست گزار نوں 15توں 20لکھ قرضے دی سہولت دی دیواں گے۔ ہن تیکر لکھاں کینال زمین لینڈ بنک وچ آگئی اے۔
اوہناں نے ہور آکھیا کہ طریقہ کار بنا رہے آں کہ پہلے کس زمین اُتے گھر بنائیے۔ یاد رہوے کہ ایس توں پہلاں اعلان کیتا گیا سی کہ گھر لین دے امیدواراں نوں اپنے گھر دی کل لاگت دا 20فیصد بطور ڈاؤن پے منٹ جمع کروانا پئے گا۔ جدکہ باقی 80فیصد پیسے حکومت ولوں دتے جان گے۔ ایہناں خیالاں دا اظہار پاکستان تحریک انصاف دے رہنما فردوس شمیم نقوی نے صوبائی وزیر برائے ہاؤسنگ میاں محمود الرشید تے ہاؤسنگ منصوبے اُتے بنائی گئی ٹاسک فورس دے چیئرمین زیغم رضوی نال سانجھی پریس کانفرنس نال خطاب کردے ہوئے کیتاسی ۔تے ایہ پہلی وار سی کہ حکومت ولوں 20فیصد ڈاؤن پے منٹ بارے کوئی اعلان کیتا گیا ۔ کیونکہ ایس توں پہلاں حکومت ولوں ہاؤسنگ منصوبے بارے ایس طرحاں دی کوئی گل نہیں کیتی گئی سی۔
