اسلام آ باد(پاکستان پوائنٹ نیوز17۔نومبر۔2018ء) وزیر اعظم عمران خان دا یوٹرن بارے نواں بیان اک وار فیر بحث ہیٹھ اے۔سیاسی مبصرین تے سیاسی رہنماواں ولوں وی وزیراعظم دے نویں بیان اُتے تبصریاں دا سلسلاجاری اے۔ ایس موقعے اُتے تحریک انصاف دے رہنما عامر لیاقت نے وی ٹویٹ کردے ہوئے آکھیا اے کہ یوٹرن واپس پلٹن والے نوں آکھدے نیں۔ ساڈے دین وچ واپس پلٹن والا ’رجوع‘ کرن والا اے۔واپس پلٹنا چنگا ہوندا اے گل اُتے جمے رہنا چنگا نہیں ہوندا۔ اوہناں دا ہور آکھنا سی کہ عمران خان نے یوٹرن توں مراد رجوع نوں لیا اے۔ تے صحیح مطلب اخذ کیتا اے۔ عامر لیاقت دا آکھنا سی کہ ہر وڈا لیڈر تے انسان یوٹرن لیندا سی تے لیندا رہوے گا
۔یاد رہوے کہ یاد رہوے کہ پچھلے دیہاڑے وزیر اعظم عمران خان نے سینئر پرچاکاراں نال گل بات کردے ہوئے اپنے یوٹرن دے سوال اُتے آکھیا کہ نواز شریف نے عدالت وچ یوٹرن نہیں لیا بلکہ جھوٹھ بولیا ۔سپریم کورٹ دے فیصلیاں اُتے عملدرآمد کراں گے۔ اوہناں دا آکھنا سی کہ نپولین تے ہٹلر نے یوٹرن نہ لے کے تاریخی شکست کھادی۔ حالات دے مطابق یوٹرن نہ لین والا کدی چنگا لیڈر نہیں بن سکدا۔ وزیر اعظم دا آکھنا سی کہ جو یوٹرن لینا نہ جاندا ہوئے اوہدے توں وڈا بے وقوف نہیں اے۔ عمران خان نے آکھیا کہ کرپشن کیساں دا ساہمنا کرن والے چیئرمین پی اے سی نہیں بن سکدا۔ شہباز شریف نوں چیئرمین پی اے سی بنانا ملک نال مذاق ہوئے گا۔اوہناں دا آکھنا سی کہ شہباز شریف نوں کسے صورت چیئرمین پی اے سی نہیں بناواں گے۔ اوہناں نے آکھیا کہ دبئی وچ پاکستانیاں دے 15ارب ڈالر دا سراغ لا لیا اے۔ منی لانڈرنگ دے خلاف مہم کامیابی نال جاری اے۔ لُٹی ہوئی دولت دی واپسی لئی کم جاری اے۔ لُٹی دولت دی واپسی لئی کئی ملکاں نال سمجھوتے کر رہے آں۔وزیر اعظم نے آکھیا کہ برطانیہ تے سوئٹزر لینڈ نال سمجھوتا ہوگیا اے۔ نیب نِکے مقدمیاں وچ اُلجھ گیا اے۔ جیہدی وجہ توں نیب دی کارکردگی متاثر ہو رہی اے۔ احتساب قانون وچ ترمیم دی ضرورت اے۔ اوہناں نے آکھیا کہ نیب قانون وچ ترمیم کراں گے۔ دورہ چین بارے گل بات کردے ہوئے اوہناں نے آکھیا کہ چینی دورے دے مثبت نتیجے ساہمنے آ رہے نیں۔ چین کولوں ہر قسم دی امداد مل رہی اے۔ چینی دورے توں مطمئن آں۔ چین توں ملن والا پیکج لیک ہو گیا تے دوجے ملک وی اجیہا پیکج منگن گے۔
