لاہور(پاکستان پوائنٹ نیوز16۔نومبر۔2018ء) نیب نے ڈاکٹر مجاہد کامران دے الزاماں نوں بے بنیاد قرار دے دتا، نیب حکام دا آکھنااے کہ نیب آفس وچ کسے واش روم اندر کیمرہ نہیں اے، دعوا جھوٹھ اے، تشدد تے فواد حسن بارے الزام وی بے بنیاد نیں۔ میڈیا رپورٹس مطابق نیب نے سابق وائس چانسلر ڈاکٹر مجاہد کامران دے انکشافات نوں بے بنیاد قرار دے دتا اے۔ نیب دا آکھنا اے کہ ڈاکٹر مجاہد کامران نے لک پیڑ دی شکایت کیتی سی۔
اوہناں نوں بھوئیں اُتے گدھا وچھا کے لمے پین دی اجازت دتی۔ ترجمان نے آکھیا کہ نیب آفس وچ کسے واش روم اندر کیمرہ نہیں لگا۔ نیب دے وسیلیاں نے دسیا کہ حراست دوران مجاہد کامران نال اوہناں دی گھر دی ملاقات کروائی گئی۔ تفتیشی افسراں مجاہد کامران نال چنگا سلوک کیتا سی۔یاد رہوے کہ نجی ٹی وی نال اُچیچی(خصوصی) گل بات کردے ہوئے مجاہد کامران نے دسیا کہ سرکاری یونیورسٹیاں وچ 10توں 20فیصد اُستاد ایڈہاک اُتے کم کردے نیں۔
سنڈیکیٹ وچ ہائی کورٹ دے حاضر سروس جج ہوندے نیں۔ ایڈیشنل سیکرٹری ہائر ایجوکیشن ہوندا، ایڈیشنل سیکرٹری فنانس تے گورنر ولوں نامزد تن ممبر وی ہوندے نیں۔ سنڈیکیٹ بالکل آپ مختار ادارہ اے ۔ وائس چانسلر دا سنڈیکیٹ اُتے کوئی کنٹرول نہیں ہوندا اے۔ اوہناں نے آکھیا کہ میں جیل وچ رہ کے ویکھیا اے کہ نیب جے کسے نوں غلط وی پھڑدی اے تے اوہناں دی انا ایس گل دا تقاضا کردی اے کہ ہن اسیں جے ایہنوں پھڑ لیا تے ساڈے بارے ایہ ثابت نہ ہوئے کہ اسیں غلط پھڑیا اے۔
اوہناں دا آکھنا سی کہ میں بہت سارے لوک اوتھے بے گناہ گرفتار ویکھے نیں۔ نیب دے جیل سیل دے 14کمرے نیں۔ سارے کمرے آہمنے ساہمنے نیں جیہناں وچ 7کمرے اک پاسے تے 7ای دوجے پاسے نیں۔ اوہناں نے آکھیا کہ شہباز شریف سیل نمبر 13وچ نیں۔ شہباز شریف اپنے سیل وچ اکلے ای نیں جدکہ باقی سیل وچ چار چار بندے نیں۔ اوتھے دن تے رات دا پتا نہیں چلدا۔ ہر ویلے لائٹاں بلدیاں رہندیاں نیں۔
اوہناں نے آکھیا کہ سیل وچ سی سی ٹی وی کیمرے لگے ہوئے نیں بلکہ جو گل بات وی کیتی جائے اوہ اوہناں نوں سُنائی دیندی اے۔ شرمناک گل ایہ اے کہ جتھے لوک غسل کردے نیں اوتھے وی سی سی ٹی وی کیمرہ لگا اے۔ اوہناں نے ساڈے لئی منجیاں منگوائیاں پر میں آکھیا کہ میں بھوئیں اُتے دوجے لوکاں طرحاں ای سویا کراں گا۔ اوہناں نے آکھیا کہ میرے سیل وچ نندی پور وچ کم کرن والا اک ڈرائیور سی جیہنے غلطی نال اپنے موبائل وچ فرنس آئل چوری ہون دی تصویر بنائی۔ اوہ تصویر اوہنے کسے نوں وکھائی تے اوہ اوہنوں باس کول لے گئے۔ باس نے رشوت دے کے اوہدے خلاف ای کیس بنوایا تے اوہ ڈھائی سال پہلے وی جیل وچ رہیا۔ ایہدے مگروں نیب چُک کے لے آئی اے۔ بندے نے آکھیا کہ میرے بال رُل گئے نیں۔
