اسلام آباد(پاکستان پوائنٹ نیوز16۔نومبر۔2018ء) سپیکر پنجاب اسمبلی چودھری پرویز الہی اپنے ای وچھائے جال وچ پھس گئے نیں۔ تفصیل مطابق سپریم کورٹ آف پاکستان وچ چودھری پرویز الہی خلاف اک ریفرنس دی سنوائی ہوئی۔ جیہدے وچ الزام لایا گیا اے کہ چودھری پرویز الہی نے راولپنڈی نیڑے تخت پری دے جنگل دی زمین اُتے زبردستی قبضہ کیتا۔ تخت پری راولپنڈی شہر توں 6کلو میٹر، گرینڈ ٹرنک روڈ اُتے اک قطہ زمین اے جو جنگل لئی رکھی گئی سی۔
ایہدا اصل رقبہ 1741ایکڑ دی بجائے 2210ایکڑ سی۔ایس قطہ زمین اُتے بحریہ ٹاؤن دے مالک ملک ریاض تے محکمہ جنگلات دے افسراں دی ملی بھگت نال نہ صرف غیر قانونی قبضہ کیتا گیا بلکہ کاغذات وچ تبدیلی کر کے ایہدے ریکارڈ دی تصیحح وی کر دتی گئی جو کہ قانون دی خلاف ورزی سی۔ ایس کیس نوں جدوں سپریم کورٹ آف پاکستان و چ پیش کیتا گیا تے جسٹس آصف سعید کھوسہ نے آکھیا کہ ملک دے سبھ توں وڈے بلڈر بارے بہت ساریاں گلاں مشہو ر نیں۔
اسلام آباد وچ وی اوہناں خلاف کیس موجود اے تے اک فیصلے دے تحت اوہناں کولوں 590ایکڑ زمین چھڈوائی گئی اے۔جیہدے اُتے اوہناں نے غیر قانونی طور اُتے قبضہ کر لیا سی۔ اوہناں نے اوس زمین نوں کوڈیاں دے بھاء مُل لیا سی۔ چیف جسٹس دا آکھنا سی کہ ایہ تے صرف اک کیس اے ۔ ملک ریاض بارے تے ہور وی کئی مسئلے موجود نیں۔ 5رکنی بنچ جیہدی سربراہی چیف جسٹس کر رہے سن، نے 3دسمبر تیکر ریونیو افسراں کولوں سرکاری زمیناں دا ریکارڈ منگ لیا اے۔
سنوائی دوران ایہ گل ساہمنے آئی کہ 270کنال زمین جنگلات دی تقسیم ویلے پرویز الہی نے اپنے گھر والیاں، جیہدے وچ چودھری سالک الہی، چودھری منیر تے عالیہ شجاعت نوں دے دتی سی۔ایس بارے جسٹس اعجاز الحسن نے حیرانی نال پُچھیا کیہ ایہ صرف اتفاق اے تے ایہدا نتیجہ کڈھیا جا سکدا اے؟۔سیاسی مبصرین مطابق پرویز الہی بارے ایہ انکشافات ساہمنے آن مگروں اوہناں لئی نویاں اوکڑاں پیدا ہو سکدیاں نیں تے عین ممکن اے کہ ایہ الزام اوہناں دے سیاسی کیریئر نوں وی نقصان اپڑائے۔
