سپریم کورٹ نے وزیر اعلا پنجاب کولوں اہم ترین اختیار کھوہ لیا

سپریم کورٹ نے اینٹی کرپشن مقدمیاں وچ وزیر اعلا دی اجازت دا اختیار معطل کر دتا

سپریم کورٹ نے وزیر اعلا پنجاب کولوں اہم ترین اختیار کھوہ لیا
سپریم کورٹ نے اینٹی کرپشن مقدمیاں وچ وزیر اعلا دی اجازت دا اختیار معطل کر دتا

لاہور(پاکستان پوائنٹ نیوز16۔نومبر۔2018ء) سپریم کورٹ نے اینٹی کرپشن مقدمیاں وچ وزیر اعلا ولوں اجازت دین دا اختیار معطل کر دتا اے۔ سپریم کورٹ لاہور رجسٹری وچ چیف جسٹس پاکستان میاں ثاقب نثار دی سربراہی وچ تن رکنی بنچ نے ڈی جی اینٹی کرپشن دی درخاست اُتے سنوائی کیتی۔ ڈی جی اینٹی کرپشن ولوں صفدر شاہین پیرزادہ ایڈووکیٹ پیش ہوئے۔ ڈی جی اینٹی کرپشن حسین اصغر نے سپریم کورٹ رجسٹری وچ درخاست جمع کروائی سی۔

ڈی جی اینٹی کرپشن نے عدالت وچ آکھیا کہ وڈے بیوروکریٹس خلاف کارروائی لئی وزیر اعلا پنجاب دی اجازت ضروری تے وزیر اعلا اجازت نہ دیوے تے وڈے بیوروکریٹس خلاف مقدمہ درج نہیں کر سکدے۔ عدالت نے اینٹی کرپشن رولز6,5تے 10نوں معطل کر دے ہوئے آکھیا کہ کسے وی وزیر اعلا کولوں کرپشن مقدمیاں وچ اجازت لین دا اختیار غیر آئینی اے، سیاسی اجازت لینا تے فوجداری قانون دی بنیادی روح دے اُلٹ اے۔

سپریم کورٹ نے اینٹی کرپشن انکوائریاں بارے لاہور ہائی کورٹ وچ سنوائی ہیٹھ مقدمے وی 2ہفتیاں وچ نبیڑن دا حکم دتا۔ایس توں وکھ نجی ہسپتالاں بارے کیس دی سنوائی دوران چیف جسٹس نے پرائیویٹ ہسپتالاں دے علاج دے طریقہ کار اُتے اعتراض چُکیا۔ سپریم کورٹ لاہور رجسٹری وچ پرائیویٹ ہسپتالاں وچ مہنگے علاج بارے آپ نوٹس کیس دی سنوائی دوران۔ چیف جسٹس نے ہسپتالاں دی اُساری بارے ڈی جی ایل ڈی کولوں رپورٹ منگدے ہوئے ڈی جی ایل ڈی اے نوں 19نومبر نوں رپورٹ سنے پیش ہون دا حکم دتا۔ سنوائی دوران چیف جسٹس نے ریمارکس دتے کہ ڈاکٹر تے نیشنل ہسپتال بارے مطمئن نہیں آں۔ پرائیویٹ ہسپتالاں دا ایہ مطلب نہیں کہ صرف پیسہ ای کمانا اے۔