اسلام آباد(پاکستان پوائنٹ نیوز15۔نومبر۔2018ء) وفاقی وزیر اطلاعات و نشریات فواد چودھری نے چیئرمین سینیٹ نوں خبردار کردے ہوئے آکھیا اے کہ چیئرمین سینیٹ توازن پیدا نہیں کر سکدے تے سوچنا پئے گا، مینوں لکھاں لوکاں نے منتخب کر کے گھلیا اے جدکہ چیئرمین سینیٹ سدھے منتخب عوامی نمائندے نہیں، چیئرمین سینیٹ دی رولنگ توں کابینہ مطمئن نہیں۔ اوہناں نے وفاقی کابینہ دے اجلاس مگروں پریس کانفرنس کردے ہوئے آکھیا سیاستدان ای ملک چلاندے تے برباد کردے نیں۔
اسیں 10سال ویکھیا اے کہ کس طرحاں ملک چلایا گیا اے۔ حکومت دیاں 193کمپنیاں مسائل دا شکار نیں۔ سیف سٹی دے ناں اُتے 1600کیمرے لائے گئے نیں۔ 600کیمرے خراب نیں جو گڈیاں دی نمبر پلیٹ وی نہیں وکھا سکدے۔ اوہناں نے آکھیا کہ طاہر داوڑ دی میت حوالے کرن دی صورتحال واضح نہیں اے۔ افغانستان ولوں اک عجیب مسئلا چل رہیا اے۔ بارڈراُتے ایس ویلے عجیب و غریب صورتحال اے۔
اوہناں نے آکھیا کہ 100دناں دے پلان دیاں کامیابیاں لوکائی ساہمنے رکھاں گے۔ وزیر اعظم 29نومبر نوں کارکردگی لوکائی ساہمنے رکھن گے۔ اسیں جو 100دناں وچ کیتا اے کوئی حکومت اوہدے نیڑے وی نہیں اپڑی۔ اسیں ای گورننس ول ودھ رہے آں۔وفاقی وزیر اطلاعات و نشریات فواد چودھری نے چیئرمین سینیٹ نوں خبردار کردے ہوئے آکھیا اے کہ چیئرمین سینیٹ توازن پیدا نہیں کر سکدے تے سوچنا پئے گا۔
اوہناں دا آکھنا سی کہ مینوں لکھاں لوکاں نے منتخب کر کے گھلیا اے جدکہ چیئرمین سینیٹ سدھے منتخب عوامی نمائندے نہیں۔ چیئرمین سینیٹ دی رولنگ توں کابینہ مطمئن نہیں۔ یاد رہوے کہ اج چیئرمین سینیٹ نے وفاقی وزیر اطلاعات فواد چودھری دی سینیٹ داخلے اُتے پابندی دی رولنگ جاری کیتی ۔ چیئرمین سینیٹ صادق سنجرانی نے رولنگ دیندے ہوئے آکھیا کہ وزیر اطلاعات فواد چودھری نوں ایوان وچ آکے معافی منگنی چاہیدی۔
معافی منگن تیکر فواد چودھری دے چالو(رواں)اجلاس وچ رلت کرن اُتے پابندی ہوئے گی۔ ایوان بالا اُچیاں ریتاں دا حامل رہیا اے تے آؤندے ویلے نوں وی رہوے گا۔ ایوان وچ کُجھ چِر توں بدمزدگی پیدا ہو رہی اے۔ چیئرمین سینیٹ نے اپنی رولنگ وچ ہور آکھیا کہ لازمی اے کہ ایس طرحاں دیاں گلاں تے رویاں توں احتیاط کرو۔ ہاؤس نوں چنگے طریقے نال چلان وچ حکومت دی بُہتی ذمے واری اے۔
کسے ممبر نوں انج دے لفظاں یاں اشاریاں دا استعمال نہیں کرنا چاہیدا جیہدے نال ایوان دا تقدس مجروح ہوئے۔ اوہناں دا آکھنا سی کہ وزیر اطلاعات خلاف قوائد(3)13تے رول 264دے تحت کارروائی کیتی جا رہی اے۔ فواد چودھری جاری باقی سیشنز وچ رلتی نہیں ہو سکدے۔ چیئرمین سینیٹ صادق سنجرانی نے آکھیا اے کہ سینیٹ وچ بدمزدگی پیدا ہونا شروع ہوئی اے۔ ساڈے ساریاں اُتے لازم اے کہ احتیاط کرئیے۔ جمعرات نوں چیئرمین سینیٹ نے وفاقی وزیر اطلاعات نوں معافی منگن دی ہدایت کردے ہوئے آکھیا کہ فواد چودھری ایوان وچ آکے معافی منگن، جے معافی نہیں منگن گے تے اوہناں اُتے جاری اجلاس وچ داخلے اُتے پابندی لانا واں۔
