اسلام آباد(پاکستان پوائنٹ نیوز15۔نومبر۔2018ء) سیاسی جماعتاں دے آپس وچ اختلاف کوئی وڈی گل نہیں اے۔ ایہ سیاسی لڑائی کئی وار سوشل میڈیا تیکر جا اپڑدی اے۔ سیاسی جماعتاں دے رہنماواں ولوں اک دوجے اُتے ڈاڈھی تنقید وی کیتی جاندی اے۔ کُجھ انج ای گورنر سندھ عمران اسماعیل نال ہویا۔ تفصیل مطابق گورنر سندھ عمران اسماعیل نے ٹویٹر اُتے ٹویٹ کردے ہوئے آکھیا کہ اوہناں نے مسیحی برادری دے اک وفد نال ملاقات کیتی، جیہدی سربراہی سسٹر ایربن سٹیفن کر رہیاں سن۔ ایس دوران اوہناں نے گورنر سندھ نوں سکول دی زمین اُتے کیتے جان و الے قبضے بارے وی دسیا۔ عمران اسماعیل نے مسیحی وفد نوں یقین دوایا کہ سکول دی زمین توں چھیتی قبضہ چھڈوا لیا جائے گا۔
پر عمران اسماعیل دے ایس ٹویٹ اُتے خواجا آصف نے وی ردعمل دتا تے اوہناں دے ٹویٹ وچوں انگریزی دیاں کئی غلطی کڈھیاں۔ خواجا آصف نے آکھیا کہ جو ساہمنے بیٹھے سن اوہناں کولوں ای انگریزی وچ ٹویٹ لکھوا لیندے یاں گھٹو گھٹ سپیلنگ ای پُچھ لیندے۔ عمران اسماعیل نے ٹویٹ وچ delegationدے لفظ نوں deligationلکھیا ایس توں وکھ coorperationنوں Corporationلکھیا۔ سوشل میڈیا ورتیندڑاں نے وی ایہدے اُتے اپنے ردعمل دا اظہار کیتا اے۔ کُجھ ورتیندڑاں نے آکھیا کہ جدوں ایف اے پاس بندے نوں گورنر سندھ لایا جائے گا تے انج ای ہوئے گا جدکہ کُجھ ورتیندڑاں نے خواجا آصف اُتے ای تنقید شروع کر دتی۔
