لاہور(پاکستان پوائنٹ نیوز15۔نومبر۔2018ء) لاہور دے علاقے شادباغ وچ تہرے قتل دی اصل کہانی ساہمنے آ گئی اے۔ تفصیل مطابق لاہوردے علاقے شاد باغ دے چن شاہ قبرستان وچ ماں تے دھیاں نوں قتل کرن والا حیدر عرف بالو سی جیہدا والد شادباغ دا رہائشی ملک اصغر ڈھلواں عرف بلو پیپلز پارٹی ولوں 2 وار ایم این اے تے ایم پی اے دے ٹکٹ اُتے الیکشن وی لڑ چکیا سی۔
ایہو نہیں اوہدی کئی کاروباری بندیاں نال دشمنی وی لگی آ رہی سی۔ مخالفاں دے دو بندیاں دے قتل وچ جیل وی کٹ چکیا سی تے ہر ویلے اسلحہ اپنے نال رکھدا سی جدکہ اوہنے 8ویاہ کیتے ہوئے سن۔ جیہناں وچوں اوہدے 14پُتر تے تن دھیاں نیں۔ وسیلیاں مطابق ملک اصغر ڈھلواں نے اپنی ساری جائیداد قتل ہون والیاں دو دھیاں 10ورھیاں دی سعدیہ تے 12ورھیاں دی روبینہ تے زخمی ہون والی 14ورھیاں دی انعم دے ناں لائی ہوئی سی جیہدی وجہ توں اوہدیاں باقی بیویاں تے بالا ں نال لڑائی رہندی سی۔
ایسے وجہ توں کُجھ دن پہلاں شیخوپورہ وچ اصغر دیاں دو بیویاں نے اوہنوں قتل کر دتا سی۔ ایسے جائیداد دے جھیڑے اُتے 15سال پہلاں اصغر بلو دے پُتر حیدر عرف بھالو دی ماں گُڑیا نوں پچھلے دیہاڑے قتل ہون والی نائلہ دے پُتر نے قتل کر دتا سی جیہدا حیدر نوں غصہ سی۔ حیدر اپنی سوتیلی ماں نائلہ تے سگیاں دھیاں نوں والد ملک اصغر دی قبر اُتے لے گیا۔ ایس موقعے اُتے حیدر نال اوہدا بھنویا سجاول وی سی ، جتھے اوہناں نے فائرنگ کر کے اوہناں نوں قتل کر دتا۔ 14ورھیاں دی زخمی انعم نے پولیس نوں اپنا بیان ریکارڈ کروایا، جیہدے اُتے حیدر تے سجاول خلاف تہرے قتل دا مقدمہ درج کر لیا گیا اے۔
