اسلام آباد(پاکستان پوائنٹ نیوز15۔نومبر۔2018ء) سابق وزیر اعظم نواز شریف دی احتساب عدالت وچ پیشی دے موقعے اُتے ڈاڈھی بدنظمی ویکھن وچ آئی۔ پاکستان مسلم لیگ (ن) دے قائد و سابق وزیر اعظم نواز شریف نے العزیزیہ ریفرنس وچ بطور ملزم اپنا بیان ریکارڈ کروایا سی تے اج وی اوہناں نے جواب جمع کروائے۔ اج نواز شریف سوالاں دے جواب جمع کروان لئی احتساب عدالت اپڑے تے نواز شریف نوں ملن وچ چھیتی کرن دے چکر وچ صدیق الفاروق پوڑھیاں وچوں ڈگ پئے۔
موقعے اُتے موجود بندیاں نے اوہناں نوں سہارا دے کے کھڑا کیتا۔یاد رہوے کہ اج سابق وزیر اعظم نواز شریف نے دوجے دیہاڑے وی العزیزیہ ریفرنس وچ بیان ریکارڈ کرایا۔ جمعرات نوں اسلام آباد دی احتساب عدالت دے جج ارشد ملک نے العزیزیہ ریفرنس دی سنوائی کیتی تے لگاتار دوجے دیہاڑے نواز شریف اپنا بیان ریکارڈ کروان عدالت وچ پیش ہوئے۔نواز شریف ہن تیکر مجموعی طور اُتے 151سوالاں وچوں 89دا جواب دے چکے نیں۔
پچھلے دیہاڑے اوہناں نے 44سوالاں دے جواب دتے سن۔ عدالت نے اوہناں نوں جان دی اجازت دیند ے ہوئے دوپہر دو وجے فیر سدیا۔ دوبارہ سنوائی دے شروع اُتے نواز شریف نے احتساب عدالت ولوں پُچھے گئے سوالاں دے جواب وچ آکھیا کہ 1999دے مارشل لاء مگروں ساڈے کاروبار دا ریکارڈ قبضے وچ لیا گیا تے ایس حوالے نال شکایت وی درج کروائی پر کوئی کارروائی نہیں ہوئی۔
نواز شریف نے آکھیا کہ میرا قطری خطاں نال کوئی تعلق نہیں۔ میرا ناں کیتے وی کسے وی دستاویزات وچ شامل نہیں اے جدوں کہ میں کسے وی ٹرانزیکشن دا حصہ نہیں رہیا۔ نواز شریف نے واجد ضیاء دے بیاناں اُتے اعتراض کیتا۔ نواز شریف نے آکھیا کہ جج صاحب ساڈے نال ایہ صرف 1999وچ نہیں ہویا۔ ایہ ہمیشہ ہوندا آیا اے۔ ساڈے خاندان دی درد بھری کہانی اے۔ سابق وزیر اعظم نے آکھیا کہ 1972وچ پاکستان دی سبھ توں وڈی سٹیل مل اتفاق فاؤنڈری نوں قومیا لیا گیا۔ کسے نے نہیں پُچھیا کہ کھان دے پیسے وی تہاڈے کول ہیں نیں یاں نہیں۔ نواز شریف نے آکھیا کہ میں 1972وچ سیاست وچ وی نہیں سی۔ میں 80دے دہاکے وچ سیاست شروع کیتی۔
