2وزیراں نے ائر پورٹ اُتے اپنے ای کپڑے ساڑ دتے

اسلام آباد(پاکستان پوائنٹ نیوز15۔نومبر۔2018ء) دو وزیراں نے اسلام آباد ائر پورٹ اُتے اپنے کپڑے ساڑ دتے۔ تفصیل مطابق سوشل میڈیا اُتے اک ویڈیو وائرل ہو رہی اے۔ ویڈیو وچ ویکھیا جا سکدا اے کہ کُجھ لوکاں نے ائر پورٹ اُتے کپڑٰ ساڑے نیں۔ دسیا جا رہیا اے کہ ائر پورٹ اُتے کپڑے ساڑ کے احتجاج کرن والے کوئی ہور نہیں بلکہ گلگت بلتستان دے صوبائی وزیر سیاحت فدا خان تے وزیر قانون اورنگزیب ایڈووکیٹ نیں۔ آکھیا جا رہیا اے کہ اسلام آباد توں گلگت بلتستان جان والی قومی اُڈان منسوخ ہو گئی جیہدی وجہ توں گلگت جان والے مسافراں نوں اوکڑاں دا ساہمنا کرنا پیا۔ اُڈان منسوخ ہون اُتے صوبائی وزیر فدا خان غصے وچ آگئے ۔ ائر پورٹ اُتے عملے نال مندا سلوک وی کیتا، جیہدی ویڈیو سوشل میڈیا اُتے وائرل ہوگئی اے۔ صوبائی وزیر فدا خان ا آکھنا اے کہ گلگت بلتستان دے مسافراں نال مندا سلوک کیتا جا رہیا اے۔ اوہناں نے احتجاج کردے ہوئے اپنا کوٹ وی ائر پورٹ اُتے ساڑیا۔ جیہدی وجہ توں ائر پورٹ اُتے موجود مسافراں تے ہور لوکاں نوں اوکڑاں دا ساہمنا کرنا پیا۔ مسافراں دا آکھنا سی کہ تحریک انصاف حکومت دی ناقص کارکردگی دی وجہ توں سانوں ایہناں مسئلیاں دا ساہمنا کرنا پیا اے۔ پر دوجے پاسے وسیلیاں دا آکھنا اے کہ اسلام آباد توں گلگت جان والی اُڈان تن دن توں منسوخ ہو رہی اے پر اج مسافراں کولوں صبر نہ ہویا تے اوہناں نے ائر پورٹ اُتے احتجاج کیتا۔احتجاج کرن والیاں وچ صوبائی وزیر سیاحت فدا خان تے اورنگزیب ایڈووکیٹ وی شامل سن۔