نواز شریف دا قطری خط توں لاتعلقی دا اظہار

میرا قطری خطاں نال کوئی تعلق نہیں، میرا ناں کیتے وی کسے وی دستاویزات وچ شامل نہیں اے، میں کسے وی ٹرانزیکشن دا حصہ نہیں رہیا،ساڈے خاندان دی دُکھ بھری کہانی اے:نواز شریف دا عدالت وچ بیان

نواز شریف دا قطری خط توں لاتعلقی دا اظہار
 میرا قطری خطاں نال کوئی تعلق نہیں، میرا ناں کیتے وی کسے وی دستاویزات وچ شامل نہیں اے، میں کسے وی ٹرانزیکشن دا حصہ نہیں رہیا،ساڈے خاندان دی دُکھ بھری کہانی اے:نواز شریف دا عدالت وچ بیان

اسلام آباد(پاکستان پوائنٹ نیوز15۔نومبر۔2018ء) سابق وزیر اعظم نواز شریف نے قومی اسمبلی دی تقریر توں استثنا مگروں قطری خط توں وی لاتعلقی دا اظہار کر دتا۔ تفصیل مطابق سابق وزیر اعظم نواز شریف نے دوجے دیہاڑے وی العزیزیہ ریفرنس وچ بیان ریکارڈ کرایا۔ جمعرات نوں اسلام آباد دی احتساب عدالت دے جج ارشد ملک نے العزیزیہ ریفرنس دی سنوائی کیتی تے لگاتار دوجے دیہاڑے نواز شریف اپنا بیان ریکارڈ کروان عدالت وچ پیش ہوئے۔

نواز شریف ہن تیکر مجموعی طور اُتے 151سوالاں وچوں 89دا جواب دے چکے نیں۔ پچھلے دیہاڑے اوہناں نے 44سوالاں دے جواب دتے سن۔ عدالت نے اوہناں نوں جان دی اجازت دیند ے ہوئے دوپہر دو وجے فیر سدیا۔ دوبارہ سنوائی دے شروع اُتے نواز شریف نے احتساب عدالت ولوں پُچھے گئے سوالاں دے جواب وچ آکھیا کہ 1999دے مارشل لاء مگروں ساڈے کاروبار دا ریکارڈ قبضے وچ لیا گیا تے ایس حوالے نال شکایت وی درج کروائی پر کوئی کارروائی نہیں ہوئی۔

نواز شریف نے آکھیا کہ میرا قطری خطاں نال کوئی تعلق نہیں۔ میرا ناں کیتے وی کسے وی دستاویزات وچ شامل نہیں اے جدوں کہ میں کسے وی ٹرانزیکشن دا حصہ نہیں رہیا۔ نواز شریف نے واجد ضیاء دے بیاناں اُتے اعتراض کیتا۔ نواز شریف نے آکھیا کہ جج صاحب ساڈے نال ایہ صرف 1999وچ نہیں ہویا۔ ایہ ہمیشہ ہوندا آیا اے۔ ساڈے خاندان دی درد بھری کہانی اے۔ سابق وزیر اعظم نے آکھیا کہ 1972وچ پاکستان دی سبھ توں وڈی سٹیل مل اتفاق فاؤنڈری نوں قومیا لیا گیا۔ کسے نے نہیں پُچھیا کہ کھان دے پیسے وی تہاڈے کول ہیں نیں یاں نہیں۔ نواز شریف نے آکھیا کہ میں 1972وچ سیاست وچ وی نہیں سی۔ میں 80دے دہاکے وچ سیاست شروع کیتی۔