کراچی(پاکستان پوائنٹ نیوز14۔نومبر۔2018ء) نیب نے پیراگون ہاؤسنگ سوسائٹی دے ڈائریکٹر قیصر امین بٹ نوں گرفتار کرلیا اے۔ میڈیا رپورٹس مطابق مسلم لیگ (ن) دے رہنما قیصر امین بٹ نوں لاہور نیب دی ٹیم نے گرفتار کیتا۔ اوہناں نوں سویرے اندرون سندھ توں گرفتار کیتاگیا۔ نیب ٹیم لاہور نے اندرون سندھ وچ خصوصی آپریشن کیتا۔ جیہدے مگروں قیصر امین بٹ نوں گرفتار کیتا گیا۔
میڈیا رپورٹس مطابق قیصر امین بٹ سعد رفیق دے پارٹنر سن۔ قیصر امین بٹ اُتے ارباں رُپئے دے گھپلے کرن دا الزام اے۔ قیصر امین بٹ تے سعد رفیق 15سال توں پیراگون ہاؤسنگ سوسائٹی دے حصے دار نیں۔ یاد رہوے کہ پچھلے دیہاڑے پاکستان مسلم لیگ(ن) دے مرکزی رہنما خواجا سعد رفیق نے لاہور ہائی کورٹ وچ ڈی جی نیب شہزاد سلیم خلاف درخاست دائر کیتی۔ خواجا سعد رفیق نے درخاست وچ آکھیا کہ ڈی جی نیب لاہور شہزاد سلیم دے انٹرویو توں پتا چل گیا کہ اوہ (ن) لیگ خلاف پارٹی بن گئے نیں، اک جانبدار بندہ تفتیش کیویں شفاف کرسکدا اے؟میڈیا رپورٹس مطابق ڈی جی نیب شہزاد سلیم دے جھیڑوے (متنازعہ) انٹرویو نے اپوزیشن جماعتاں دے رہنماواں نوں تشویش وچ پا دتا۔
جیہدے مگروں اپوزیشن جماعتاں نے شہزاد سلیم خلاف قومی اسمبلی وچ تحریک استحقاق وی پیش کیتی۔ ایس توں وکھ چیئرمین نیب نے اوہناں خلاف انکوائری دا حکم وی دتا تے پیمرا کولوں اوہناں دے انٹرویو دا ریکارڈ وی منگیا۔ پر پچھلے دیہاڑے خواجا سعد رفیق نے لاہور ہائی کورٹ وچ ڈی جی نیب شہزاد سلیم خلاف درخاست دائر کیتی۔ خواجا سعد رفیق نے درخاست وچ آکھیا کہ ڈی جی نیب شہزاد سلیم (ن) لیگ خلاف میڈیا ٹرائل کر رہے نیں جدکہ انکوائری دیاں کہانیاں وی پیش کر رہے نیں۔جیہدے توں اوہناں دی جانبداری اُتے سوالیہ نشان لگ گیا اے۔ سعد رفیق نے لاہور ہائی کورٹ توں استدعا کیتی اے کہ ڈی جی نیب شہزاد سلیم دی بجائے کسے ہور افسر کول (ن) لیگی رہنماواں دے کیس لائے جان۔
