اسلام آباد(پاکستان پوائنٹ نیوز14۔نومبر۔2018ء) نجی ٹی وی چینل دے پروگرام وچ گل بات کردے ہوئے سینئر پرچا کار چودھری غلام حسین نے آکھیا کہ سوشل میڈیا اُتے ایہ آکھیا جا رہیا اے کہ آسیہ بی بی نوں باہرلے ملک منتقل کر دتا گیا اے تے باہرلے ملک منتقلی مگروں آسیہ بی بی تے اوہناں دے گھر والیاں نے پوپ فرانس نال ملاقات کیتی، جیہدیاں تصویراں تے ویڈیوز وی سوشل میڈیا اُتے وائرل ہو رہیاں نیں۔
اوہناں نے پروگرام دوران سوشل میڈیا اُتے وائرل تصویراں تے ویڈیوز وکھائیاں تے آکھیا کہ پوپ فرانس نال ملن والی بالڑی آسیہ بی بی دی دھی اے۔ چودھری غلام حسین نے آکھیا کہ ایہ سبھ اک پراپیگنڈے دے تحت کیتا جا رہیا اے ، ایہدے وچ کوئی سچائی نہیں اے۔ سوشل میڈیا اُتے وائرل ہون والیاں تصویراں تے ویڈیوز راہیں ایہ پراپیگنڈا کرن دی کوشش کیتی جا رہی اے کہ آسیہ بی بی باہرلے ملک چلی گئی تے پوپ فرانس نال آسیہ بی بی دے گھر والیاں دی ملاقات دیاں تصویر نوں بطور ثبوت دے پیش کیتا جا رہیا اے حالانکہ ایہ تصویراں تے ویڈیوز ہن دیاں نہیں بلکہ اپریل2015دیاں نیں۔
