اسلام آباد(پاکستان پوائنٹ نیوز14۔نومبر۔2018ء) چیئرمین سینیٹ صادق سنجرانی دی صدارت ہیٹھ سینیٹ دا اجلاس ہویا۔ اج وی سینیٹ وچ حکومتی ارکان تے اپوزیشن وچکار گرما گرمی ویکھن وچ آئی۔ وزیر اطلاعات فواد چودھری نے آکھیا کہ مشاہد اللہ یاں اوہناں دی پارٹی نوں کل دے بیان اُتے معافی منگنی چاہیدی۔ اسیں پارلیمنٹ وچ کدی غیر پارلیمانی لفظ نہیں ورتے۔
اسیں ایتھے کرپشن دی گل کرنے آں تے سینیٹ دا ماحول خراب ہو جاندا اے۔فواد چودھری نے آکھیا کہ اپوزیشن چاہندی اے کہ احتساب دا معاملا نہ چُکیا جائے۔ ایس موقعے تے سینیٹ وچ اپوزیشن نے رولا پایا۔ مسلم لیگ (ن) دے رہنما مشاہد اللہ نے فوا د چودھری نال اوہناں دی سیٹ اُتے جا کے ہتھ ملایا پر فیر وی سینیٹ دا ماحول ٹھنڈا نہ ہویا تے فواد چودھری دے خطاب دوران اپوزیشن نے سینیٹ اجلاس توں واک آؤٹ کر دتا۔
چیئرمین سینیٹ نے آکھیا کہ وزیر سینیٹ دا ماحول خراب کر رہے نیں ۔ وزیر جان تے اپوزیشن نوں منا کے لیان۔ فواد چودھری نے ایس موقعے اُتے آکھیا کہ تُسیں ساڈے کولوں معافی منگواندے او پر اپوزیشن نوں پُچھدے وی نہیں۔ مشاہد اللہ نے غیر موجودگی وچ گل کیتی۔ اوہناں نے جو گل کیتی اوہ غیر مناسب سی۔ یاد رہوے کہ پچھلے دیہاڑے مشاہد اللہ خان نے وزیر اطلاعات فواد چودھری بارے آکھیا سی کہ فواد چودھری جیب کتریاں کولوں پیسے لیندے نیں۔ کئی وار جہلم توں پتا لگا کہ فواد چودھری نہ چور نیں، نہ ڈاکو نہ بھتہ خور پر سارے چوراں ڈاکوواں تے بھتہ خوراں دا مہینہ وار اجلاس اوہناں دے گھر وچ ہوندا اے۔
