لاہور(پاکستان پوائنٹ نیوز14۔نومبر۔2018ء) لاہور دے علاقے شاد باغ وچ سگے پُتر نے ماں تے تن بھیناں اُتے فائرنگ کر دتی۔ تفصیل مطابق صوبائی راجدھانی لاہور دے علاقے شادباغ وچ چن شاہ قبرستان وچ سگے پُتر نے ماں تے دو بھیناں نوں فائرنگ کر کے قتل تے اک نوں زخمی کر دتا۔ قبرستان توں ماں تے دو دھیاں دیاں لاشاں برآمد ہوئیاں جدکہ تیجی دھی نوں زخمی حالت وچ ہسپتال منتقل کر دتا گیا۔
ایس پی معاذ ظفر نے دسیاکہ پولیس نوں قبرستان وچ لاشاں دی موجودگی دی اطلاع سویرے چھ وجے ملی۔ پولیس نے موقعے اُتے اپڑ کے ویکھیا تے اک سوتیلی دھی زخمی حالت وچ سی جدکہ باقی سبھ فوت ہو چکیاں سن۔ معاذ ظفر نے آکھیا کہ مڈھلیاں تحقیقات وچ ایہ گل ساہمنے آئی اے کہ اوہناں دا خاندانی جھیڑا سی پر ایس حوالے نال ہور تحقیقات جاری نیں۔ ہسپتال وچ زیر علاج کُڑی نے پولیس نوں دسیا کہ اوہدے والد اصغر علی عرف بلو نوں کُجھ دن پہلاں شیخوپورہ وچ مبینہ طور اُتے اوہناں دی دوجی بیوی دے گھر فائرنگ کر کے قتل کر دتا گیا سی۔
کُڑی دے مطابق اوہناں دا بھنویا اوہناں دی ماں دی قبر اُتے فاتحہ خوانی کرن لئی لیایا۔ جدوں اوہ اپنی سوتیلی ماں تے دو بھیناں نال قبرستان اپڑیاں تے بھنویے تے اوہدے ساتھی گارڈ نے مبینہ طور اُتے فائرنگ کر دتی، جیہدے نتیجے وچ اوہدی سوتیلی ماں تے دو بھیناں موقعے اُتے ہلاک ہو گئیاں پر اوہ زخمی حالت وچ نس گئی۔پولیس نوں مقامی بندیاں نے واقعے دی اطلاع دتی جیہدے مگروں کُڑی نوں زخمی حالت وچ ہسپتال منتقل کیتا گیا جتھے اوہدا علاج جاری اے۔دوجے پاسے وزیر اعلا پنجاب عثمان بزدار نے ایس واردات دا آپ نوٹس لیندے ہوئے رپورٹ منگ لی اے۔
