لاہور(پاکستان پوائنٹ نیوز13۔نومبر۔2018ء) پاکستان مسلم لیگ(ن) دے مرکزی رہنما خواجا سعد رفیق نے لاہور ہائی کورٹ وچ ڈی جی نیب شہزاد سلیم خلاف درخاست دائر کردتی اے۔ خواجا سعد رفیق نے درخاست وچ آکھیا اے کہ ڈی جی نیب لاہور شہزاد سلیم دے انٹرویو توں پتا چل گیا کہ اوہ (ن) لیگ خلاف پارٹی بن گئے نیں، اک جانبدار بندہ تفتیش کیویں شفاف کرسکدا اے؟میڈیا رپورٹس مطابق ڈی جی نیب شہزاد سلیم دے جھیڑوے (متنازعہ) انٹرویو نے اپوزیشن جماعتاں دے رہنماواں نوں تشویش وچ پا دتا۔
جیہدے مگروں اپوزیشن جماعتاں نے شہزاد سلیم خلاف قومی اسمبلی وچ تحریک استحقاق وی پیش کیتی۔ ایس توں وکھ چیئرمین نیب نے اوہناں خلاف انکوائری دا حکم وی دتا تے پیمرا کولوں اوہناں دے انٹرویو دا ریکارڈ وی منگیا۔ پر اج خواجا سعد رفیق نے لاہور ہائی کورٹ وچ ڈی جی نیب شہزاد سلیم خلاف درخاست دائر کر دتی اے۔ خواجا سعد رفیق نے درخاست وچ آکھیا کہ ڈی جی نیب شہزاد سلیم (ن) لیگ خلاف میڈیا ٹرائل کر رہے نیں جدکہ انکوائری دیاں کہانیاں وی پیش کر رہے نیں۔
جیہدے توں اوہناں دی جانبداری اُتے سوالیہ نشان لگ گیا اے۔ سعد رفیق نے لاہور ہائی کورٹ توں استدعا کیتی اے کہ ڈی جی نیب شہزاد سلیم دی بجائے کسے ہور افسر کول (ن) لیگی رہنماواں دے کیس لائے جان۔دوجے پاسے اج میڈیا رپورٹس مطابق چیئرمین نیب جسٹس (ر) جاوید اقبال دی صدارت ہیٹھ لاہور آفس وچ اجلاس ہویا۔ اجلاس وچ ڈی جی نیب لاہور نے شریف فیملی دے کیساں وچ پیشرفت بارے بریفنگ دتی۔ چیئرمین نیب نے آکھیا کہ کسے تفتیشی افسر نوں کسے کولوں ڈرن دی لوڑ نہیں اے۔بدعنوان عناصر نوں انصاف دے کٹہرے وچ لیا کے ساہ لواں گے۔ اوہناں نے آکھیا کہ میگا کرپشن کیساں نوں منطفی انجام تیکر اپڑانا نیب دی پہلی ترجیح اے۔
