شوہر اُتے جھوٹھاالزام لان والیاں سوانیاں ہو جان تیار

پشاور(پاکستان پوائنٹ نیوز13۔نومبر۔2018ء) شوہر اُتے جھوٹھا الزام لان والیاں سوانیاں ہو جان تیار،شوہر اُتے جھوٹھا الزام لان والیاں سوانیاں نوں 50ہزار جرمانہ ہوئے گا۔ میڈیا رپورٹس مطابق خیبرپختونخوا وچ گھریلو تشدد نوں روکن لئی اک قانونی مسودہ تیار کیتا گیا اے۔ جیہنوں بحث تے منظوری لئی صوبائی اسمبلی دے آؤندے اجلاس وچ پیش کیتا جائے گا۔ صوبائی کابینہ ولوں منظوری مگروں گھریلو تشدد کرن اُتے خاوند نوں 30ہزار رُپئے جرمانہ تے تن مہینے قید ہوئے گی تے لگاتار تشدد کرن اُتے وی خاوند نوں سزا ہوئے گی۔

ایس توں وکھ سوانیاں لئی وی قانون بنان دا فیصلا کیتا گیا اے۔ اوہ سوانیاں جو اپنے خاوند اُتے جھوٹھا الزام لاؤندیاں نیں تے فیر ثابت نہیں کر پاندیاں اوہناں نوں 50ہزار رُپئے جرمانہ ہوئے گا۔ ایہدے نال نال خاوند نوں گھر والی نوں دفتر یاں فیر کسے ہور تھاں ڈران دھمکان اُتے وی سزا وار ہوئے گا۔ ایس توں وکھ سوشل میڈیا، موبائل فون یاں اوہناں دے رشتے داراں نوں دھمکان اُتے وی خاوند نوں سزا ملے گی۔ بل وچ ہور آکھیا گیا اے کہ ناچاکی دی صورت وچ خاوند نوں بیوی دی سلامتی دی ضمانت دینی پئی گی تے خاوند بیوی تے اپنے بالاں نوں خرچہ دین دا وی پابند ہوئے گا۔