اسلام آباد(پاکستان پوائنٹ نیوز12۔نومبر۔2018ء) وزیراعظم عمران خان نال قطر ی فوج دے چیف آف سٹاف دی ملاقات،قطر ی فوج دے چیف آف سٹاف نے وزیراعظم نوں امیر قطر تے وزیر اعظم دا سنیہا اپڑایا۔تفصیل مطابق قطری فوج دے سربراہ وزیر اعظم تے امیر قطر ولوں خاص سنیہا لے کے پاکستان دے دورے اُتے اپڑ گئے نیں۔ایس موقعے تے سول و عسکری حکام نے ائر پورٹ اُتے اوہناں دا استقبال کیتا۔
جیہدے مگروں اوہ وزیر اعظم ہاؤس اپڑے، جتھے اوہناں نے وزیر اعظم عمران خان نال ملاقات کیتی۔ ایس موقعے تے قطری چیف آف سٹاف نے وزیر اعظم عمران خان نوں عہدہ سنبھالن اُتے مبارکباد دتی۔ ملاقات وچ پاک قطر باہمی مفاداں اُتے اطمینان دا اظہار کیتا گیا۔ ایس ملاقات وچ وزیر اعظم عمران خان نوں امیر قطر تے قطری وزیر اعظم ولوں گھلیا گیا سنیہا اپڑایا گیا۔
وزیر اعظم عمران خان نے قطری آرمی چیف دا شکریہ ادا کیتا تے اوہناں دی محبت دا جواب محبت نال ای دتا۔ایس توں وکھ میڈیا رپورٹس مطابق قطر ولوں اک لکھ پاکستانیاں نوں نوکریاں دین دے اعلان مگروں ہن اہم پیش رفت ساہمنے آئی اے۔ قطر نے پاکستانیاں دی بھرتی لئی ویزا سنٹر قائم کرن دا فیصلا کر لیا اے۔قطر دا وفد وزیر اعظم عمران خان دے معاون خصوصی زلفی بخاری نال ملاقات کرے گا۔ ملاقات دوران پاکستانی شہریاں دی بھرتی دے حوالے نال گل بات ہوئے گی۔ یاد رہوے کہ قطر دے وزیر خارجا محمد بن عبدالرحمان پاکستان دے دورے اُتے آئے سن۔ ایس موقعے تے اوہناں نے پاکستانیاں لئی 1لکھ نوکریاں دا اعلان کیتا سی۔
