لاہور(پاکستان پوائنٹ نیوز12۔نومبر۔2018ء) مشہور عالم دین مولانا طارق جمیل نال دبئی وچ نچن والی ڈانسر مہک ملک نے ملاقات کیتی، ملاقات دوران ڈانسر نے ڈانس توں توبہ کیتی، مہک ملک نے آکھیا کہ میرے توبہ کرن اُتے میرے بھراواں نے میرا سِر پاڑ دتا کہ توں نچنا چھڈ دتا تے اسیں کتھوں کھاواں گے؟مولانا طارق جمیل نال ملاقات دوران ہور 10ڈانسر کُڑیاں نے وی توبہ کیتی۔
میڈیا رپورٹس مطابق عالم دین مولانا طارق جمیل نے آکھیا دو تن دن پہلاں مینوں ملازم نے آکھیا کہ باہر تہانوں دو عورتاں ملن آئیاں نیں۔ میں اوہنوں آکھیا کہ اوہناں نوں جان دیو ، مینوں کیوں ملن آئیاں نیں۔ سوانیاں نے فیر سنیہا گھلیا کہ مولانا نوں دسو کہ اسیں ’محلے‘ توں آئیاں آں، میں آکھیا کہ بلاو اوہناں عورتاں نوں، اوہناں وچوں اک نائیکہ سی جو بہت خطرناک کردار ہوندا اے جیہدا کم کُڑیاں تیار کرنا ہوندا اے ، تے اک ڈانسر سی جو دبئی جاندی سی۔
اوہناں نے آکھیا کہ مولانا تہاڈی گل سُنی تے توبہ کرلی۔ پر میرے بھراواں نے مار مار کے سِر پاڑ دتا اے کہ توں نچنا چھڈ تے اسیں روٹی کتھوں کھاواں گے؟ایہناں کُڑیاں نے آکھیا کہ میرا کوئی وظیفہ لا دیو اسیں ہن حرام کم نہیں کرنا۔ مولانا طارق جمیل نے آکھیا کہ جدوں میں اوہناں کُڑیاں نوں جا کے ملیا تے پتا لگا کہ کِنا مظلوم طبقہ اے۔ مولانا طارق جمیل نے آکھیا کہ سردار صاحب، سردار صاحب ای رہندا اے جدکہ غریب دی دھی طوائف بن جاندی اے۔ میاں صاحب میاں ای رہندا اے جدکہ گھنگھرو پان والی طوائف دا داغ لے کے ہی قبر وچ جاندی اے۔
