اسلام آباد(پاکستان پوائنٹ نیوز12۔نومبر۔2018ء) وزیراعظم دی کفایت شعاری مہم دے تحت وزارت مواصلات دیاں 76گڈیاں دی نیلامی دا عمل جاری اے۔ میڈیا رپورٹس وچ دسیا گیا اے کہ وزیر اعظم عمران خان دی ہدایت اُتے کئی وزارتاں وچ کفایت شعاری دی مہم جاری اے، جیہدے اُتے عمل کردے ہوئے وزارت مواصلات نے خرچیاں وچ کمی نال ساڈھے تن ارب رُپئے بچائے نیں۔کفایت شعاری مہم دے تحت وزارت مواصلات نے اپنیاں وادھو گڈیاں نیلام کر دتیاں نیں جدکہ اعزازیہ تے انٹرٹینمنٹ فنڈز وی ختم کر دتے نیں۔
وادھو گڈیاں توں آن والے 20کروڑ 88لکھ رُپئے قومی خزانے وچ جمع کروا دتے گئے۔ فیول تے مرمتی کماں وچ کمی دی وجہ توں ہور 52لکھ رُپئے دی بچت ہوئی۔ جدکہ وزارت ولوں تجاوزات دے آپریشن وچ اک ارب 28کروڑ رُپئے وصول کیتے گئے تے غیر قانونی ٹھیکے تے گھپلیاں وچ 40کروڑ رُپئے دی ریکوری کر لی گئی، جدکہ دو مہینے وچ وزارت مواصلات دی آمدن وچ 77کروڑ رُپئے دا وادھا وی ہویا۔
