برطانیہ(پاکستان پوائنٹ نیوز10۔نومبر۔2018ء) برطانیہ نے آسیہ بی بی نوں پناہ دین توں انکارکردتا۔غیر ملکی میڈیا دے مطابق برطانیہ نے توہین رسالت کیس وچ بری ہون والی آسیہ بی بی دی پناہ دین دی اپیل رد کر دتی۔ برطانیہ دا آکھنا اے کہ ملک وچ آسیہ بی بی دی آمد نال بدامنی پیدا ہون دا ڈر اے۔ رپورٹ وچ ہور لکھیا گیا اے کہ پاکستان وچ مسیحی سوانی نے توہین رسالت دے الزام وچ 8سال جیل وچ لنگھائے نیں ۔
پر پاکستان دی سپریم کورٹ نے آسیہ بی بی نوں الزام ثابت نہ ہون اُتے رہا کر دتا سی۔ آسیہ بی بی دی رہائی نے مذہبی جماعتاں ولوں احتجاج نو ں جنم دتا۔ جیہدے مگروں حکومت وی ایس گل اُتے مجبور ہو گئی کہ اجے تیکر آسیہ بی بی نوں ملک اندر ای رکھیا جائے۔ آسیہ بی بی دے وکیل سیف الملوک نے وی آکھیا سی کہ اوہناں دی زندگی نوں خطرہ اے جدکہ آسیہ بی بی دے شوہر عاشق مسیح نے برطانیہ دے وزیر اعظم نوں تحفظ دین دی اپیل کیتی سی۔
آسیہ بی بی لئی باہرلے ملک کم کرن والی کمیونٹی دا آکھنا اے کہ برطانیہ سکیورٹی خدشیاں دی وجہ توں آسیہ بی بی نوں پناہ نہیں دیوے گا۔ برطانوی پاکستان کرسچن ایسوسی ایشن دے چیئرمین ولسن چودھری نے آکھیا کہ دو ملکاں نے آسیہ بی بی نوں پناہ دین دی آفر کیتی سی پر برطانیہ ایہدے وچ شامل نہیں سی۔ولسن چودھری دا ہور آکھنا سی کہ برطانوی حکومت نوں ایس گل دا ڈراے کہ آسیہ بی بی دی برطانیہ منتقلی نال سکیورٹی خدشے تے کمیونٹی دے کئی بندیاں وچ بے چینی نہ پیداجائے۔
