لاہور(پاکستان پوائنٹ نیوز10۔نومبر۔2018ء) وزیر اعظم عمران خان نے لاہور وچ شلٹر ہوم دی نیہہ رکھ دتی۔ تفصیل مطابق وزیر اعظم عمران خان اج اک دن دے دورے اُتے لاہور اپڑے نیں۔ وزیر اعظم عمران خان نے لاہور وچ شلٹر ہوم دی نینہ رکھی۔ وزیراعظم عمران خان نے شلٹر ہوم دی سائٹ دا معائنہ وی کیتا تے ایس بارے ہدایتاں وی جاری کیتیاں۔ عمران خان نے منصوبے دے کئی حصیاں دا وی دورہ کیتا۔
ایس موقعے تے وزیر اعظم عمران خان دا آکھنا سی کہ آؤندے 10دناں وچ غربت نوں ختم کرن دا پیکیج ساہمنے لیاواں گے۔ خیراتی ادارے چلان والیاں نوں اک چھتری ہیٹھاں اکٹھے کراں گے۔ لوکاں نوں غربت وچوں کڈھن لئی چین توں فائدہ لواں گے۔ اوہناں نے آکھیا کہ عثمان بزدار دا تعلق اجیہے علاقے نال اے جتھے بجلی تیکر نہیں اے۔ جنوبی پنجاب وچ بنیادی سہولتاں دی کمی اے۔
ڈھائی لکھ لوکاں لئی پانی، بجلی نہیں اے۔ ڈاکٹر تے ہسپتال نہیں نیں۔ عثمان بزدار دا چناؤ انج ای اے جیویں میں انضمام تے وسیم اکرم دا چناؤ کیتا سی۔ عثمان بزدار وی انضمام تے وسیم اکرم ثابت ہوئے گا۔ اوہناں نے آکھیا کہ جدوں کوئی انسان مشکل وچ آؤندا اے تے اوہنوں احساس انسانیت دی لوڑ ہوندی اے۔ ایتھے سڑکاں اُتے لوک سوندے نیں۔ مینہہ پئے یاں گرمی سردی ، اوہ کیویں سوندے ہون گے؟جو سڑکاں اُتے سوندے نیں تے اوہناں دی صحت کِداں دی ہوئے گی؟اوہناں دی کسے نوں کوئی فکر نہیں اے۔ اوہناں نے آکھیا کہ مدینہ دی ریاست دے اصول لوکاں دی فلاح دے سن۔اسیں مدینہ دی ریاست دے اصولاں نوں نال لے کے چلنا اے۔
