100دن توں پہلاں ای پی ٹی آئی دی حکومت وچ پُھٹ پے گئی

یار اوس سرور نوں کنٹرول کرو:پرویز الہی دی جہانگیر ترین نوں شکایت

100دن توں پہلاں ای پی ٹی آئی دی حکومت وچ پُھٹ پے گئی
یار اوس سرور نوں کنٹرول کرو:پرویز الہی دی جہانگیر ترین نوں شکایت

لاہور(پاکستان پوائنٹ نیوز10۔نومبر۔2018ء) سپیکر پنجاب اسمبلی چودھری پرویز الہی تے پی آئی آئی دے سینئر رہنما جہانگیر ترین دی ملاقات دی اندرونی کہانی ساہمنے آ گئی، دوناں دی ملاقات وچ وزیر اعلا عثمان بزدار تے گورنر چودھری سرور بارے کیہ گل ہوئی، فوٹیج نے بھانڈا بھن دتا۔ میڈیا رپورٹس مطابق سپیکر پنجاب اسمبلی چودھری پرویز الہی تے پی ٹی آئی دے سینئر رہنما جہانگیر ترین وچکار ملاقات دوران طارق بشیر چیمہ وی موجود سن۔

چودھری پرویز الہی نے جہانگیر ترین نوں آکھیا کہ یار اوس سرور نوں کنٹرول کرو، جیہدے اُتے طارق بشیر چیمہ نے آکھیا کہ تہاڈے چیف منسٹر نوں اوہنے چلن نہیں دینا۔یاد رہوے کہ اج سپیکر پنجاب اسمبلی چودھری پرویز الہی نال پاکستان تحریک انصاف دے سینئر رہنما جہانگیر ترین نے اوہناں دے گھر ملاقات کیتی۔ ایس موقعے تے وفاقی وزیر ہاؤسنگ طارق بشیر چیمہ تے صوبائی وزیر معدنیات حافظ عمار یاسر وی موجود سن۔

دوناں رہنماواں وچکار چالو ملکی سیاسی صورتحال تے سینیٹ وچ پنجاب دیاں دو سیٹاں اُتے الیکشن دے حوالے نال حکمت عملی بارے وچار وٹاندراکیتا گیا۔ چودھری پرویز الہی نے آکھیا کہ عمران خان پاکستان نوں مشکل حالات توں کڈھن لئی بڑی محنت کر رہے نیں۔ اوہناں نے آکھیا کہ مینوں یقین اے کہ پاکستان چھیتی قرضیاں توں نجات حاصل کرکے خشحالی دیاں منزلاں طے کرے گا۔