لاہور(پاکستان پوائنٹ نیوز10۔نومبر۔2018ء) مسلم لیگ (ن) دے صدر و سابق وزیر اعلا پنجاب شہباز شریف دے ریمانڈ وچ 14دن دی توسیع کر دتی گئی۔ تفصیل مطابق شہباز شریف نوں اج احتساب عدالت لیاندا گیا۔ شہباز شریف نوں سید نجم الحسن دی عدالت وچ پیش کیتا گیا۔ عدالت وچ ملزم شہباز شریف دی پیشی اُتے عدالتی کمرے وچ وکیلاں دے نعریاں اُتے جج سید نجم الحسن نے آکھیا کہ ایس رولے وچ کیویں کیس دی سنوائی کراں گا؟احتساب عدالت وچ سنوائی دے شروع اُتے نیب دے وکیل نے شہباز شریف دے ہور جسمانی ریمانڈ دی استدعا کردے ہوئے آکھیا کہ پچھلے ریمانڈ وچ اسمبلی اجلاس دی وجہ توں تفتیش نہ ہو سکی۔
نیب نے آشیانہ ہاؤسنگ سکینڈل وچ نیب کورٹ توں استدعا کیتی کہ شہباز شریف نوں 15دناں دے جسمانی ریمانڈ اُتے حوالے کیتا جائے۔ شہباز شریف نے عدالت وچ آکھیا کہ حلفن آکھنا واں کہ پروڈکشن آرڈر دے دوران وی میرے کولوں تفتیش کیتی گئی۔ تفتیشی افسر نے عدالت نوں دسیا کہ ملزم شہباز شریف نے اوہناں نوں دھمکی دتی جیہدے اُتے شہباز شریف نے آکھیا کہ میں کوئی دھمکی نہیں دتی، میرے اُتے الزام غلط اے۔
نیب کورٹ دے جج سید نجم الحسن نے عدالت دے باہر ہون والے رولے تے نعرے بازی توں تنگ آ کے سنوائی دوران حمزہ شہباز نوں مخاطب کردے ہوئے آکھیا کہ تُسیں سمجھاؤ ایہناں نوں، عدالت دا ماحول خراب نہ کرو، حمزہ شہباز نے آکھیا کہ ہنگامہ آرائی کرن والے کارکن نہیں بلکہ وکیل نیں۔ شہباز شریف دے وکیل نے سنوائی دوران دلائل دتے کہ نیب نے اج تیکر کوئی ثبوت عدالت وچ پیش نہیں کیتا، جیویں تفتیش کیتی گئی اوہدے بعد جسمانی ریمانڈ دی کوئی وجہ نہیں بندی۔
نیب دے وکیل نے عدالت نوں دسیا کہ احد چیمہ نے اک جعلی فزیبلٹی رپورٹ بنائی۔ شہباز شریف نے آکھیا کہ میں تے دسیا فزیبلٹی رپورٹ نال میرا کوئی تعلق نہیں۔ نیب کورٹ نے جسمانی ریمانڈ دی توسیع دے مطالبے نوں منظور کردے ہوئے شہباز شریف دے ریمانڈ وچ 14دن دی توسیع کر دتی۔ عدالت نے شہباز شریف نوں 24نومبر نوں فیر عدالت ساہمنے پیش کرن دا حکم دتا۔جیہدے مگروں نیب شہباز شریف نوں لے کے نیب دفتر چلی گئی۔
