اسلام آباد(پاکستان پوائنٹ نیوز09۔نومبر۔2018ء) چیئرمین پیپلز پارٹی بلاول بھٹو زرداری نے چیئرمین پی اے سی دا عہدہ لین توں معذرت کرلی، وزیر اعظم نے اپوزیشن ولوں خواجا آصف دا ناں رد کر کے بلاول بھٹو نوں چیئرمین پی اے سی دی آفر کیتی سی۔ میڈیا رپورٹس مطابق حکومت ولوں اپوزیشن لیڈر قومی اسمبلی شہباز شریف دا ناں بطور چیئرمین پبلک اکاؤنٹس کمیٹی رد کرن اُتے اپوزیشن نے دو ناں پارلیمانی کمیٹی نوں دتے سن۔
پر اج جدوں وزیر اعظم عمران خان نوں پی اے سی دی سربراہی لئی بریفنگ دتی گئی تے دسیا گیا کہ اپوزیشن ولوں چیئرمین بلاول بھٹو تے مسلم لیگ (ن) دے خواجا آصف دا ناں آیا اے۔ ایہناں ناواں سنے ہور ناواں بارے صلاح کیتی جا رہی اے۔ عمران خان نے ایس موقعے تے خواجا آصف دا ناں ساہمنے آؤندے ای رد کر دتا۔ اوہناں نے خفگی دا اظہار کردے ہوئے آکھیاکہ خواجا آصف منی لانڈرنگ وچ ملوث نیں، اوہناں نوں کیویں پی اے سی کمیٹی دا چیئرمین بنایا جا سکدا اے؟جیہدے مگروں حکومت نے چیئرمین پی اے سی لئی بلاول بھٹو نوں آفر کیتی ،جیہدے اُتے ہن بلاول بھٹو نے معذرت کر لی اے۔
دوجے پاسے قومی اسمبلی وچ اپوزیشن جماعتاں نے ڈی جی نیب لاہور دے جھیڑوے انٹرویو خلاف تحریک استحقاق جمع کروا دتی اے، اپوزیشن نے ایوان توں منگ کیتی اے کہ ڈی جی نیب خلاف کارروائی کیتی جائے، ڈی جی نیب نے خفیہ تحقیقات تے دستاویزات میڈیا اُتے وکھائیاں، ڈی جی نیب نے چیئرمین نیب دی خاہش نال ٹی وی چینلز نوں انٹرویو دتا۔میڈیا رپورٹس مطابق ڈی جی نیب لاہور شہزاد سلیم دے جھیڑوے (متنازعہ) انٹرویو خلاف اپوزیشن جماعتاں نے قومی اسمبلی وچ تحریک استحقاق جمع کروا دتی اے۔
تحریک استحقاق دے متن وچ آکھیا گیا اے کہ ڈی جی نیب نے ارکان اسمبلی دی ساکھ مجروح کرن دی کوشش کیتی۔ ڈی جی نیب نے اپوزیشن ارکان دا میڈیا ٹرائل کیتا۔ ڈی جی نیب نے خفیہ تحقیقات تے دستاویزات میڈیا اُتے وکھائیاں۔ ڈی جی نیب نے چیئرمین دی خاہش نال ٹی وی چینلز نوں انٹرویو دتا۔ اپوزیشن جماعتاں نے ڈی جی نیب لاہور خلاف کارروائی دی منگ کیتی۔دوجے پاسے میڈیا رپورٹس مطابق سپریم کورٹ وچ چیف جسٹس ثاقب نثار دی سربراہی وچ تن رکنی بنچ بنا دتا گیا اے۔
تن رکنی بنچ 12نومبر نوں کیس دی سنوائی کرے گا۔ عدالت نے درخاست گزار نوں نوٹس جاری کر دتا اے۔یاد رہوے کہ اپوزیشن جماعتاں نے ڈ ی جی نیب لاہور شہزاد سلیم دی جعلی ڈگری دا معاملا چُکیا ۔ اوہناں نے متعلقہ اداریاں توں منگ کیتی کہ ڈی جی نیب دی جعلی ڈگری دا نوٹس لیا جائے۔
