اسلام آباد(پاکستان پوائنٹ نیوز09۔نومبر۔2018ء) سپریم کورٹ نے ڈی جی نیب لاہور دی جعلی ڈگری اُتے ایکشن لے لیا اے، چیف جسٹس نے جعلی ڈگری کیس سنوائی لئی مقرر کر دتا۔ میڈیا رپورٹس مطابق سپریم کورٹ وچ چیف جسٹس ثاقب نثار دی سربراہی وچ تن رکنی بنچ بنا دتا گیا اے۔ تن رکنی بنچ 12نومبر نوں کیس دی سنوائی کرے گا۔ عدالت نے درخاست گزار نوں نوٹس جاری کر دتا اے۔
یاد رہوے کہ اپوزیشن جماعتاں نے ڈ ی جی نیب لاہور شہزاد سلیم دی جعلی ڈگری دا معاملا چُکیا ۔ اوہناں نے متعلقہ اداریاں توں منگ کیتی کہ ڈی جی نیب دی جعلی ڈگری دا نوٹس لیا جائے۔ دوجے پاسے میڈیا رپورٹس مطابق ڈی جی نیب لاہور شہزاد سلیم دے جھیڑوے (متنازعہ) انٹرویو خلاف اپوزیشن جماعتاں نے قومی اسمبلی وچ تحریک استحقاق جمع کروا دتی اے۔ تحریک استحقاق دے متن وچ آکھیا گیا اے کہ ڈی جی نیب نے ارکان اسمبلی دی ساکھ مجروح کرن دی کوشش کیتی۔ ڈی جی نیب نے اپوزیشن ارکان دا میڈیا ٹرائل کیتا۔ ڈی جی نیب نے خفیہ تحقیقات تے دستاویزات میڈیا اُتے وکھائیاں۔ ڈی جی نیب نے چیئرمین دی خاہش نال ٹی وی چینلز نوں انٹرویو دتا۔ اپوزیشن جماعتاں نے ڈی جی نیب لاہور خلاف کارروائی دی منگ کیتی۔
